Paddy Procurement : तेलंगणा सरकारकडून ६० लाख टन धानाची खरेदी

Paddy Procurement : रबी भात लागवडीत तेलंगणा आघाडीवर आहे. देशातील एकूण रबी भात लागवडीपैकी तब्बल ६० टक्के क्षेत्र तेलंगणात असते. तेलंगणाने आता जवळपास १० लाख शेतकऱ्यांकडून ६० लाख टन भाताची खरेदी केली आहे. त्यासाठी शेतकऱ्यांना १२ हजार २८० कोटी रुपयांचा खर्च केला.

तेलंगणा सरकारने रबी हंगामात एकूण ८४ लाख टन भात खेरदीचे उद्दीष्ट ठेवले आहे. परंतु हे उद्दीष्ट गाठता येणार नाही, हे आता स्पष्ट झाले. सरकारला केवळ ६२ लाख टन खरेदी करता येईल. त्यापैकी आतापर्यंत ६० लाख टनांची खेरदी झाली. तर आणखी दोन किंवा तीन लाख टनांची खेरदी होईल.

तेलंगणात २८ लाख हेक्टरवर रबी पिकांची लागवड झाली होती. त्यापैकी २२ लाख हेक्टरवर भाताचीच लागवड झाली होती. राज्य सरकारने भात खरेदीसाठी ७ हजार १९२ केंद्रे उघडली होती. यंदा अवकाळी पावसाने चांगलीच हजेरी लावली. त्यामुळे सरकारच्या खरेदीवर परिणाम झाला. आतापर्यंत निम्मी केंद्रेही बंद करण्यात आली आहेत.

तेलंगणात यंदा रबी भात लागवड मोठ्या प्रमामात वाढली. केंद्राने अर्ध उकडलेला तांदूळ खरेदीत कमी रस दाखवला होता. मागील हंगामात १४ लाख ५० हजार हेक्टरवर भात लागवड झाली होती. पण केंद्र सरकारने खेरदी केली नाही. २०२०-२१ च्या हंगामात ९० लाख टनांची खरेदी झाली होती. त्यामुळे या हंगामात राज्य आणि केंद्र सरकारमध्ये भात खरेदीवरून वादही पाहायला मिळाले. अर्ध उकडलेल्या तांदळाची मागणी कमी झाल्याने केवळ कच्च्या तांदळाची म्हणजेच धानाची खरेदी करावे, अशा सूचना केंद्राने केल्या होत्या.

या वादामुळे तेलंगणा राज्य सरकारने गेल्या हंगामात केवळ ५१ लाख टन भाताची खरेदी केली होती. यंदाही केंद्र सरकारने कच्च्या तांदळाची खरेदी करणार असल्याचेच सांगितले होते. पण रबी हंगामात कच्चा तांदूळ देणे शक्य नसल्याचे मिलर्सने सांगितले होते. कारण खरिपातील धानापासून मिळणाऱ्या तांदळाच्या तुलनेत रब्बीतील धानापासून मिळणाऱ्या तांदळाचे प्रमाण कमी असते, असेही मिलर्सनी सरकारला कळवले आहे.