Narendra Modi News : पंतप्रधान मोदी आजपासून अमेरिका दौऱ्यावर

Narendra Modi Latest News : अमेरिकेचे अध्यक्ष ज्यो बायडेन यांच्या निमंत्रणावरून पंतप्रधान नरेंद्र मोदी २१ ते २४ जून या काळात अमेरिका दौऱ्यावर जात आहेत. या दौऱ्यात मोदी अमेरिकी संसदेच्या संयुक्त सत्रालाही संबोधित करणार आहेत. मोदी २१ जूनला संयुक्त राष्ट्रांच्या मुख्यालयात योगदिनाच्या कार्यक्रमाला उपस्थित राहणार आहेत, येथेही मेरी मिलबेन हजर असतील.

अमेरिकेमध्ये पंतप्रधान मोदींच्या स्वागताची जोरदार तयारी सुरू आहे. मोदी २३ जून रोजी भारतीय समुदायासमोर भाषण करणार असून या वेळी ‘ओम जय जगदीश हरे’ हे गाणे म्हटल्याने भारतात चर्चेत आलेल्या प्रसिद्ध अभिनेत्री आणि गायिका असलेल्या मेरी मिलबेन या सादरीकरण करणार आहेत.

भारतीय समुदायही मोदींचे भाषण प्रत्यक्ष ऐकण्यासाठी उत्सुक असून त्यांनी एका भव्य कार्यक्रमाचेही आयोजन केले आहे. ही संधी मिळाल्याबद्दल मिलबेन यांनी आनंद व्यक्त केला आहे.

‘एक जग, एक कुटुंब, एक भविष्य’ हे ‘जी-२०’चे घोषवाक्य आहे. मोदींच्या अमेरिका दौऱ्याच्या पार्श्‍वभूमीवर हे घोषवाक्य संयुक्तिक आहे. अमेरिका आणि भारत या जगातील दोन मोठ्या लोकशाही देशांमधील मैत्रीचे हे प्रतीक आहे. ही मैत्री जागतिक लोकशाहीसाठीची एक मोठी शक्ती आहे, अशी प्रतिक्रिया त्यांनी दिली.