Mangalvedha Bus Issue : नागपूर, रत्नागिरी हा राष्ट्रीय महामार्ग मंगळवेढ्यावरून सोलापूरला गेल्यामुळे या मार्गावरील वाहनांची गती वाढली आहे. परंतु मंगळवेढा आगाराच्या एसटीची (ST Bus) गती मात्र वाढत नसल्यामुळे प्रवासी वर्गातून संताप व्यक्त केला जात आहे.
सकाळच्या सत्रात सोलापूरहून मंगळवेढ्यास व मंगळवेढ्यावरून सोलापूर, मोहोळ तालुक्यात नोकरीच्या निमित्ताने कामावर जाण्यासाठी तसेच कामती, बेगमपूर, सोलापूर येथे जाण्यासाठी प्रवासी एसटी बसच्या प्रतीक्षेत असतात.
मंगळवेढा- सोलापूर या मार्गावर एसटीच्या सर्व थांब्यांवर थांबणाऱ्या, दर अर्ध्या तासाला एसटी गाड्या असूनही सकाळच्या सत्रात नोकरी व अन्य कामानिमित्त सोलापूरला जाण्यासाठी मंगळवेढा- सोलापूर सुपर एसटीची यापूर्वी व्यवस्था होती.
परंतु अलीकडच्या काळात ही एसटी बंद असल्यामुळे मंगळवेढ्यातून सोलापूरला जाण्यासाठीच्या प्रवासासाठी तब्बल दीड ते दोन तास प्रवास करावा लागत आहे.
पण याच प्रवासाचा कालावधी खासगी वाहनाने एक तासापेक्षा कमी लागत असल्याने प्रवाशांची पसंती खासगी वाहनांना आहे.
एकीकडे एसटी महामंडळ तोट्यात आहे आणि प्रवासी वाढवण्याच्या दृष्टीने वेगळे नावीन्यपूर्ण उपक्रम राबवत असताना या मार्गावर निश्चित कामासाठी, सोलापूरला वेळेत जाण्यासाठी व सोलापूरहून मंगळवेढ्याकडे निश्चित वेळेत येण्यासाठीची व्यवस्था परिवहन महामंडळाचे अधिकारी करीत नसल्यामुळे एसटीच्या उत्पन्नाची गती मात्र वाढेना.
या एसटीतून प्रवास करणारे प्रवासी ढिम्म प्रवासामुळे त्रस्त होऊ लागले आहेत. सध्या एकाच ठिकाणी नोकरी करणाऱ्या दोघा- चौघांनी एकत्र स्वत:च्या खासगी वाहनाचा पर्याय निवडला.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
