Pesticide Licence : तीन विक्रेत्यांचे परवाने निलंबित

सोलापूर ः कीटकनाशकांच्या विक्रीत त्रुटी आढळल्यामुळे जिल्ह्यातील माळशिरस, नातेपुते आणि आष्टी येथील तीन कृषी विक्रेत्यांचा कीटकनाशक विक्रीचा परवाना (Pesticide Licence) जिल्हा अधीक्षक कृषी अधिकारी बाळासाहेब शिंदे यांनी अनिश्चित काळासाठी निलंबित केला आहे.

विठ्ठल कृषी केंद्र (आष्टी, ता. मोहोळ), महावीर ट्रेडिंग कंपनी (माळशिरस, ता. माळशिरस) आणि कलाशंकर कृषी केंद्र, (नातेपुते, ता. माळशिरस) या तीन विक्रेत्यांचा त्यात समावेश आहे.
गेल्या दहा-बारा दिवसांपूर्वीच या विक्रेत्यांच्या दुकानांची तालुका कृषी अधिकाऱ्यांच्या पथकाने तपासणी केली. त्या वेळी या विक्रेत्यांकडे काही त्रुटी आढळल्या. त्यात प्रामुख्याने कीटकनाशकाचा साठा व भावफलक ग्राहकास सहज दिसेल, असा लावला नाही.

मॅाडर्न अॅग्रोजेनेटिक्स लिमिटेड या कीटकनाशके पुरवठा धारकाचे प्रमाणपत्र मंजूर नसतानाही त्यांच्या उत्पादनांची विक्री केली. शेतकऱ्यांना कीटकनाशक विक्री करताना आणि त्याची बिले देताना त्यावर खरेदीदाराचे नाव, औषधाचे नाव, कंपनीचे नाव, पॅकिंगप्रकार, बॅच नंबर, उत्पादनाची तारीख, मुदत संपण्याची तारीख, किंमत वा सही आदी माहिती नसल्याचे आढळले. या त्रुटींवर संबंधित दुकानदारांकडून खुलासाही मागवण्यात आला. पण तो समाधानकारक नसल्याने अखेरीस शिंदे यांनी या विक्रेत्यांचा कीटकनाशक विक्रीचा परवाना अनिश्चित काळासाठी निलंबित केला.