Kisan Sabha : शासनाने आश्‍वासने पाळण्यासाठी किसान सभेचे गाव पातळीवर निदर्शने

ॲग्रोवन वृत्तसेवा
Kisan Sabha Protest: पुणे : हिरडा खरेदी (Hirda Procurement) त्वरित सुरू करणे, हिरड्याला रास्ता हमीभाव देणे व हिरडा नुकसान भरपाईची रक्कम त्वरित अदा व्हावी, याविषयी राज्य शासनाने आश्‍वासन दिलेली आहेत.

ती त्वरित पूर्ण करावे, यासाठी आंबेगाव तालुका किसान सभेच्या वतीने तालुक्यातील गोठेत खू.,अडविरे, चिखली, जांभोरी, राजपूर अशा निवडक गावात निदर्शने करून मागण्यांचे निवेदन ग्रामसेवक यांच्याकडे मंगळवारी (ता. ६) सुपूर्द केले.

आंबेगाव तालुका किसान सभेच्या वतीने हे आंदोलन करण्यात आले होते. पुढील काळात राज्य शासनाने दिलेली आश्‍वासने त्यांनी पाळली नाही तर तीव्र आंदोलन केले जाईल, असा इशारा किसान सभेचे पुणे जिल्हा सहसचिव अशोक पेकारी यांनी दिला आहे.

या आंदोलनाचे नेतृत्व अशोक पेकारी यांनी केले होते. या वेळी राजू घोडे, रामदास लोहकरे, अशोक जोशी मच्छिंद्र वाघमारे, दत्ता गिरंगे, देविका भोकटे, सुनीता लोहकरे, संगीता लोहकरे, राजू बांबळे, सुनील लोहकरे, अशोक पारधी, नंदाराम आढारी, दगडू भोमाळे आदी उपस्थित होते.

अखिल भारतीय किसान सभेच्या नेतृत्वाखाली, शेतकऱ्यांच्या विविध मागण्यांसाठी दिंडोरी ते वाशिंद असा पहिला लाँग मार्च आणि मागील महिन्यात, दुसरा लाँग मार्च अकोले ते संगमनेर झाला.

यामध्ये पुणे जिल्ह्यातील जुन्नर आणि आंबेगाव तालुक्यातील हिरडा उत्पादक शेतकऱ्यांच्या हिरड्याला आधारभाव देऊन हिरडा खरेदी केंद्र तातडीने सुरू करणे, जून २०२० रोजी निसर्ग चक्रीवादळाने नुकसान झालेल्या आणि पंचनामे केलेल्या हिरडा उत्पादक शेतकऱ्यांना नुकसान भरपाई मिळावी.

या दोन्ही मागण्या शासनाने मान्य केल्या होत्या. परंतु अद्यापपर्यंत राज्य शासनाने याबाबत कार्यवाही सुरू केलेली दिसत नाही.