Farmer Incentive Scheme : पिककर्ज प्रोत्साहनपर लाभापासून निम्मे शेतकरी वंचित

अमरावती : नियमित पीककर्ज (Crop loan) भरणाऱ्या शेतकऱ्यांना प्रोत्साहनपर (Incentive scheme) लाभ देण्याची गती मंदावली आहे. जिल्ह्यातील १६ हजार ४६८ शेतकरी अजूनही या लाभापासून वंचित असून, त्यांना लाभ मिळेल ही प्रतीक्षा कायम आहे. 

नियमित पीकक भरणाऱ्या शेतकऱ्यांना महात्मा जोतीराव फुले कर्जमुक्ती अभियानांतर्गत पन्नास हजार रुपये प्रोत्साहनपर लाभ देण्याची योजना राज्य सरकारने लागू केली आहे.

जिल्ह्यातील ३२ हजार ६४१ शेतकऱ्यांची यादी जिल्हा उपनिबंधक कार्यालयाने बँकांकडून माहिती संकलित करून या योजनेच्या लाभासाठी पाठविली आहे. त्यापैकी आतापर्यंत १६ हजार १७३ शेतकऱ्यांना लाभ मिळाला असून निम्म्या शेतकऱ्यांना अद्याप प्रतीक्षा लागली आहे.

जिल्हा उपनिबंधक कार्यालयाने दिलेल्या माहितीनुसार जिल्ह्यात एकूण ३२,६४१ शेतकऱ्यांनी पीककर्जाची नियमित परतफेड केली आहे. यापैकी १८,६१३ खातेदारांना विशिष्ट क्रमांक प्राप्त झाला असून १७,६७८ खात्यांचे आधार प्रमाणीकरण झाले आहे.

३१९ खात्यांवर आक्षेप असून जिल्हास्तरीय समितीने यातील १४८ व तहसील स्तरावर १३३ खात्यांचे आक्षेप निकाली काढले आहेत. ७३ कोटी ५७ लाख रुपयांचा लाभ आतापर्यंत देण्यात आला आहे.