Gokul Milk Union : ‘गोकुळ’तर्फे मँगो, व्‍हॅनिला लस्सी, मसाला ताकाचे उत्पादन

Kolhapur News : कोल्हापूर जिल्हा दूध संघातर्फे (गोकुळ) (Gokul) नवीन टेट्रापॅकमधील मँगो, व्‍हॅनिला लस्सी व मसाला ताक ही उत्पादने ग्राहकांच्या सेवेत दाखल होत आहेत. गोकुळ प्रकल्प (Gokul Project) येथे संघाचे अध्यक्ष विश्वास पाटील यांच्या हस्ते अन्य संचालक, अधिकारी यांच्या उपस्थितीत टेट्रापॅकमधील मसाला ताक व मँगो, व्हॅनीला लस्सीचे लाँचिंग करण्यात आले.

मागील दोन वर्षांच्या काळात यूएचटी ट्रिटेड होमोजिनाईज्ड टोन्ड दूध ‘सिलेक्ट’ या नावाने गोकुळच्या टेट्रापॅकमधील दुधास ग्राहकांचा चांगला प्रतिसाद मिळत असल्याने मुंबई, पुणे व इतर विभागातील ग्राहकांकडून दुधाबरोबरच लस्सी व मसाला ताकाचे पॅकिंग टेट्रापॅकमध्ये उपलब्ध करून द्यावे, अशी मागणी वारंवार केली जात होती.

मुंबई व पुणे व इतर मार्केटमधील टेट्रामधील लस्सी व मसाला ताकाच्या मागणीचा विचार करता ‘गोकुळ’च्या दर्जेदार दुधापासून टेट्रापॅकिंगमध्ये ताक व लस्सी पॅकिंग करून घेण्याचा निर्णय संचालक मंडळाच्या सभेत घेण्यात आल्याचे विश्वास पाटील यांनी सांगितले.
प्रास्ताविक संघाचे कार्यकारी संचालक योगेश गोडबोले यांनी केले. आभार संचालक किसन चौगले यांनी मानले.