Talathi Bharati 2023 : मोठी बातमी! तलाठी भरती अर्ज करण्यास मुदतवाढ; सर्व्हर डाऊनमुळे शासनाचा निर्णय

Talathi Bharati : राज्यात तलाठी पदासाठी मेगाभरती केली जात आहे. जवळपास राज्यात ४६४४ हजार जागांसाठी महसूल आणि वनविभागाने जाहिरात प्रसिद्ध केली आहे. दरम्यान सर्व्हरचा गोंधळ उडाल्याने अनेकांना अर्ज भरण्यास विलंब झाला आहे. यामुळे तलाठी भरतीसाठी अर्ज करण्याची मुदत एक दिवसाने वाढविण्याचा निर्णय महसूल व वनविभागाने घेतला आहे.

तलाठी भरतीसाठी अर्ज करण्याची सोमवारी (ता. १७) संपलेली मुदत मंगळवारी (ता. १८) रात्री उशिरापर्यंत वाढविण्यात आली आहे. त्यामुळे तलाठी भरतीसाठी अर्ज दाखल करू न शकलेल्यांना दिलासा मिळाला आहे. पूर्वी २६ जून ते १७ जुलै पर्यंत अर्ज मागविण्यात आले होते.

राज्यात जवळपास लाखो तरुण-तरुणी ऑनलाईन अर्ज करत आहेत. यामुळे सर्व्हर डाऊन होण्याचा प्रकार सतत घडत होता. यामध्ये महाराष्ट्र शासनाच्या महसूल आणि वनविभागाने राज्यात तलाठ्यांच्या ४६४४ जागांसाठी जाहिरात प्रसिद्ध केली होती. दरम्यानच्या काळात महाऑनलाईनची सर्व्हर ही तांत्रिक कारणामुळे काही दिवस बंद राहिल्याने इच्छुकांना मुदतीत दाखले उपलब्ध झाले नव्हते.

शिवाय अर्जासोबत जोडण्यासाठी विविध प्रकारचे दाखले आवश्यक होते. त्यामुळे तलाठी भरतीसाठी अर्ज करण्यास काही दिवस मुदतवाढ देण्याची मागणी इच्छुकांकडून होत होती. अखेर शासनाने मुदत वाढवली, मात्र ती केवळ एक दिवसच वाढवली आहे. दरम्यान, तलाठी भरतीच्या आणखी एक हजार जागा वाढणार असून राज्यात तलाठ्यांची 5644 एवढी जम्बो भरती होणार आहे.

प्रकल्पग्रस्त, भूकंपग्रस्तांना सवलत

तलाठी भरतीत प्रकल्पग्रस्त, भूकंपग्रस्तांना विशेष सवलत देण्यात आली आहे. भरतीसाठी होणारी परीक्षा १०० प्रश्नांची व २०० गुणांची आहे. त्यात मराठी, इंग्रजी, सामान्यज्ञान आणि अंकगणित असे विषय आहेत.

गुणवत्ता यादीत येण्यासाठी किमान ४५ टक्के गुण प्राप्त करणे बंधनकारक आहे. भरतीमध्ये सहभागी झालेले बहुतेक उमेदवार ग्रामीण भागातील शेतकरी कुटुंबातून आलेले आहेत. ही भरती पारदर्शक व जलद घेण्याच्या सूचना राज्य शासनाने दिल्या आहेत, असेही महसूल विभागाच्या सूत्रांनी स्पष्ट केले.