Paddy Procurement : धान, भरडधान्य खरेदीसाठी ऑनलाइन नोंदणीला मुदतवाढ

नाशिक : ‘खरीप पणन हंगाम (Kharip Marketing Season) २०२२-२३’ मध्ये किमान आधारभूत किंमत खरेदी योजनेंतर्गत धान व भरडधान्य खरेदीसाठी ऑनलाइन नोंदणीसाठी १० ऑक्टोबरपर्यंत मुदत होती. मात्र शेतकरी नोंदणी पुरेशी झाली नाही.

त्यामुळे अन्न, नागरी पुरवठा व ग्राहक संरक्षण विभागाकडून पहिल्यांदा २१ ऑक्टोबर, दुसऱ्यांदा १० नोव्हेंबरपर्यंत मुदतवाढ देण्यात आली. तर आता पुन्हा तिसऱ्यांदा ३० नोव्हेंबरपर्यंत मुदतवाढ देण्यात आली आहे. त्याबाबत विभागाचे अवर सचिव संतोष कराड यांनी परिपत्रक काढले आहे.

‘‘धान व भरडधान्य खरेदीसाठी नावनोंदणीसाठी मुदतवाढ देण्यात आली आहे. ३० नोव्हेंबरपर्यंत ऑनलाइन नोंदणी करता येईल,’’ असे जिल्हा मार्केटिंग अधिकारी विवेक इंगळे यांनी सांगितले. मुदतवाढीबाबत राज्यातील सर्व जिल्हाधिकारी, महाराष्ट्र राज्य सहकारी मार्केटिंग फेडरेशन व महाराष्ट्र राज्य सहकारी आदिवासी विकास महामंडळाच्या व्यवस्थापकीय संचालकांना सूचित करण्यात आले आहे.