Droupadi Murmu : संघर्ष करून पुढे जा; समाजबांधवांचाही विकास करा

Nagpur News : ‘‘आदिवासींनी न्यूनगंड सोडून, शिक्षित होऊन, संघर्ष करून पुढे गेले पाहिजे. तसेच स्वतःचा आर्थिक, सामाजिक आणि शैक्षणिक विकास साधतानाच आपल्या समाज बांधवांचाही विकास केला पाहिजे,’’ असे आवाहन राष्ट्रपती द्रौपदी मुर्मू यांनी आज ( ता.6) विविध आदिवासी जमातींच्या प्रतिनिधींशी संवाद साधताना केले.

येथील राजभवनात राष्ट्रपती द्रौपदी मुर्मू यांनी आदिवासी समुहातील माडिया, कातकरी आणि कोलाम जमातींच्या प्रतिनिधींशी संवाद साधला. यावेळी राज्यपाल रमेश बैस, उपमुख्यमंत्री देवेंद्र फडणवीस, आदिवासी विकासमंत्री विजयकुमार गावित उपस्थित होते.

‘‘शाळेत जायला रस्ते नव्हते, दप्तर नसायचे, डोक्यावर कापडी पोते पांघरून भर पावसाळ्यात शाळेत जावे लागायचे. पदोपदी संघर्ष होता. त्या संघर्षावर मात करून शिक्षिका, राज्यपाल आणि देशाची राष्ट्रपती झाले,’’ अशा शब्दात राष्ट्रपतींनी आपला जीवनप्रवास उलगडला.

‘‘आदिवासींनी न्यूनगंड न बाळगता शालेय व उच्च शिक्षण घेतले पाहिजे. उच्चपदे भुषवून आपल्या समाज बांधवांनाही विकासाच्या प्रवाहात पुढे नेले पाहिजे,’’ असेही त्या म्हणाल्या. पदाची सूत्रे स्वीकारल्यानंतर देशातील जवळपास सर्वच राज्यांना भेटी दिल्या. देशात एकूण ७०० आदिवासी जमाती असून यातील ७५ जमाती या अतिमागास असल्याचे चित्रही निदर्शनास आले.

७०० जमातींच्या १ हजारांहून अधिक बोलीभाषा आहेत. या भाषांचे संवर्धन होणे आवश्यक आहे. केंद्र व राज्य शासनांनी आदिवासींच्या कल्याणासाठी विविध योजना व उपक्रम राबविले आहेत.

आदिवासींनी पुढाकार घेत समाज बांधवांना विकासाच्या मुख्य प्रवाहात आणले पाहिजे. शासनानेही आदिवासींची सामाजिक स्थिती समजून घेत त्यानुसार योजना व उपक्रमांमध्ये संयुक्तिक बदल करावेत, अशा सूचना त्यांनी केल्या.