Tuti Lagwad: परभणी जिल्ह्यात नवीन तुतीची ११३ एकरांवर लागवड

परभणी ः ‘‘जिल्ह्यात यंदा १११ शेतकऱ्यांनी ११३ एकरांवर नवीन तुती लागवड (Mulberry Cultivation) केली आहे. एकूण ४६८ शेतकऱ्यांकडील ५०५ एकरांवरील जुनी तुती लागवड आहे.

नवी-जुनी मिळून एकूण ५७९ शेतकऱ्यांकडे ६१८ एकरांवर तुती लागवड आहे. चालू आर्थिक वर्षांत डिसेंबरअखेर पर्यंत ९५.६८२ टन रेशीम कोष उत्पादन (Silk Cocoon Production) मिळाले,’’ अशी माहिती जिल्हा रेशीम कार्यालयातील सूत्रांनी दिली.

विविध कारणांनी पारंपरिक पीक पद्धतीपासून उत्पादन आणि उत्पन्नाची हमी राहिली नाही. त्यामुळे जिल्ह्यातील सर्वच तालुक्यांतील शेतकरी तुलनेने शाश्‍वत उत्पन्न देणाऱ्या कृषिपूरक रेशीम कोष उद्योगाकडे वळले आहेत.

जिल्ह्यातील ३२३ शेतकऱ्यांकडील २७५ एकरांवरील तुती लागवड बाद झाल्यानंतर एकूण ४६८ शेतकऱ्यांकडे ५०५ एकरांवर जुनी तुती लागवड राहिली आहे.

चालू आर्थिक वर्षात जिल्ह्यात २२५ एकरांवर नवीन तुती लागवड करण्याचे उद्दिष्ट होते. डिसेंबर अखेरपर्यंत १११ शेतकऱ्यांनी ११३ एकरांवर नवीन तुती लागवड केली आहे. त्यामुळे जिल्ह्यातील एकूण ५७९ शेतकऱ्यांकडे ६१८ एकरांवर तुती लागवड आहे.

चालू आर्थिक वर्षांत डिसेंबर अखेरपर्यंत जुन्या आणि नव्या शेतकऱ्यांना १ लाख ४९ हजार ७५० अंडीपुंजाचा पुरवठा करण्यात आला. त्यापासून एकूण ९२.८६२ टन रेशीम कोष उत्पादन मिळाले आहे.

परभणी जिल्ह्यातील जुनी-नवीन तुती क्षेत्र स्थिती (एकरांमध्ये)

तालुका जुनी नवीन एकूण

• परभणी ३२ ५ ३७

• जिंतूर ३८ १८ ५६

• सेलू ४८ -- ४८

• मानवत १४३ २८ १७१

• पाथरी १६ ४ २०

• सोनपेठ २८ ३ ३१

• गंगाखेड ९२ १९ १११

• पालम ९ -- ९

• पूर्णा ९९ ३६ १३५