Crop Damage Survey : ‘पंचनामे राहिलेल्या शेतकऱ्यांनो संपर्क साधा’

नगर ः ऑक्टोबर महिन्यात अतिवृष्टी (Heavy Rain) आणि सततच्या पावसामुळे झालेल्या पिकांच्या नुकसानीचे पंचनामे (Crop Damage Survey) करण्यात आले आहेत. प्रशासनाकडून ज्या शेतकऱ्यांचे पंचनामे राहिले आहेत, अशा शेतकऱ्यांनी तहसीलदारांशी संपर्क साधावा, असे आवाहन जिल्हाधिकारी डॉ. राजेंद्र भोसले यांनी केले आहे.

ऑक्टोबर महिन्यात झालेल्या नुकसानीचे पंचनामे करण्यात आले आहेत. अतिवृष्टीने बाधित २ लाख २ हजार २३६ शेतकऱ्यांच्या १ लाख २१ हजार ६२८.८८ हेक्टर क्षेत्राचे पंचनामे करण्यात आले आहेत. सततच्या पावसामुळे बाधित २ लाख ९८ हजार ७१७ शेतकऱ्यांच्या शेतांचे पंचनामे करण्यात आले आहेत.

१ लाख ८४ हजार १३५.१७ हेक्टर क्षेत्राचे पंचनामे करण्यात आले आहेत. तथापि, काही पंचनामे करावयाचे राहिले असल्यास संबंधित शेतकऱ्यांनी तहसीलदारांशी संपर्क साधावा. जिल्ह्यातील लोकप्रतिनिधींनीही एखाद्या क्षेत्राचे किंवा गावाचे पंचनामे राहिले असल्यास त्याबाबतची माहिती आपत्ती व्यवस्थापन मदत व पुनर्वसन शाखा, जिल्हाधिकारी कार्यालय येथे कळवावी, असे आवाहन करण्यात आले आहे.