Crop Damage Compensation : अवकाळी, गारपीटीच्या अनुदानाची प्रतीक्षा

Amravati News मार्च व एप्रिलमध्ये झालेल्या अवकाळी पाऊस व गारपिटीने (Hailstorm) झालेल्या नुकसान भरपाईसाठी जिल्हा प्रशासनाने एकूण ५ कोटी २८ लाख रुपयांच्या अनुदानाची (Subsidy) मागणी शासनाकडे केली आहे. यातील २ कोटी ३८ लाख रुपयांचे अनुदान मंजूर झाले असले तरी ते अद्याप अप्राप्त आहे.

१६ ते १९ मार्च दरम्यान जिल्ह्यात झालेल्या अवकाळी पाऊस व गारपिटीने १३६९ हेक्टर क्षेत्र बाधित झाले, त्याचा २६६३ शेतकऱ्यांना फटका बसला. पीक कापणीच्या वेळीच संकट आल्याने नुकसान झाले. जिल्हा प्रशासनाने पंचनामे करून २ कोटी ३८ लाख ५३ हजार ६३० रुपये अनुदानाची मागणी नोंदविली. शासनाने हा निधी मंजूर केला आहे. मात्र अद्याप ही रक्कम प्राप्त झाली नाही.

३१ मार्चला पुन्हा अवकाळी पाऊस व गारपिटीचा तडाखा जिल्ह्यातील धारणी तालुक्यास बसला. ९२७ हेक्टर शेतकऱ्यांची ७४२ हेक्टर शेतजमीन बाधित झाली. पुन्हा पंचनामे करून १ कोटी २६ लाखांचे अनुदान नुकसान भरपाईसाठी मागण्यात आले.

७ एप्रिलला अमरावती, भातकुली, तिवसा, नांदगाव खंडेश्वर, दर्यापूर, अंजनगावसुर्जी या सहा तालुक्यात अवकाळी पाऊस व गारपिटीने धुमाकूळ घालत ८८४ हेक्टरवर नुकसान केले. १६८७ शेतकरी यामुळे बाधित झाले. त्यांना नुकसान भरपाईसाठी १ कोटी रुपयांच्या अनुदानाची मागणी शासनदप्तरी नोंदविण्यात आली.

मनुष्यहानीच्या नुकसानीसाठी ६.४३ कोटी

१६ मार्चपासून जिल्ह्यात सात वेळा वादळी पाऊस व वीज पडण्याच्या घटना अवकाळी पावसासोबत घडल्या आहेत. त्यापोटी जिल्हा प्रशासनाने शासनाकडे ६ कोटी ४३ लाख रुपयांच्या अनुदानाचा प्रस्ताव पाठविला आहे.