E-Panchnama App : आता शेतीचे पंचनामे होणार अचूक आणि जलद, ‘ई-पंचनामा’ अॅपची निर्मिती

Farmers News : शेतकऱ्यांचे अस्मानी संकटामुळे मोठ्या प्रमाणात नुकसान होत असते यासाठी प्रशासनाकडून नुकसानीचे पंचनामे केले जातात. दरम्यान हे पंचनामे आता अचूक आणि वेगाने घेता यावेत यासाठी ‘ई-पंचनामा’ हे अ‍ॅप बनवण्यात आले आहे. टेक्नॉलॉजीच्या मदतीने पंचनामा करण्याचा हा देशातील पहिलाच प्रयोग नागपूर विभागात राबविण्यात येत आहे.

शेतकऱ्यांचे नुकसान झाल्यानंतर त्यांचे पंचनामे होण्यास विलंब व्हायचा याचा विचार करून आता ई-पंचनामे केले जाणार आहेत. मागच्या काही काळात झालेल्या नुकसानीचे पंचनामे येत्या ५ ऑगस्टपर्यंत पूर्ण करण्यात येणार असल्याचे त्यांनी सांगितलं. राज्यभरात १ ऑगस्टपासून महसूल सप्ताहाला सुरुवात झाली आहे. या निमित्ताने बिदरी यांनी विभागीय आयुक्त कार्यालयात पत्रकारांना ई- पंचनामे या उपक्रमाची माहिती दिली.

ते पुढे म्हणाले की, अस्मानी संकटामुळे झालेल्या नुकसानीचे तातडीने पंचनामे व्हावेत, तसेच शासनाकडून मिळणाऱ्या सर्व प्रक्रिया पारदर्शी व गतिमान करण्यासाठी विभागात ई-पंचनामे हा अभिनव प्रयोग राबविण्याचा निर्णय घेण्यात आला. तर डिसेंबर २०१२ पासून यासंदर्भात मोबाइल अॅप्लिकेशन व सॉफ्टवेअर तयार करण्याची प्रक्रीया सुरू होती.

याबाबत प्रशासनाकडून संबंधित अधिकाऱ्यांना प्रशिक्षण देण्यात आले. राज्य शासनाच्या महारिमोट सेंसिंग विभाग (एमसॅक) आणि महसूल व मदत व पुनर्वसन विभागाच्या मदतीने तयार करण्यात आलेल्या या अॅप्लिकेशनचा प्रत्यक्ष वापर सुरू करण्यात आल्याचे बिदरी यांनी माहिती दिली.

असा होतो ई-पंचनामा

नुकसानीची पाहणी करण्याकरिता स्वतः तलाठी शेतकऱ्याच्या बांधावर जातात. तेथील छायाचित्र घेऊन अॅप्लिकेशनवर अपलोड करतात.

अॅप्लिकेशनवर आधीच भरण्यात आलेल्या मंडळनिहाय सर्व्हे व गट क्रमांकनिहाय नुकसानीची ही माहिती तलाठी, ग्रामसेवक, कृषी सेवकांद्वारे भरण्यात येते. त्याची शेतकऱ्यांकडून आधीच ई-पीक पाहणीमध्ये भरण्यात आलेल्या माहितीशी पडताळणी होते.

नंतर तहसीलदारांकडून तपासून विभागीय महसूल अधिकारी, जिल्हाधिकारी, विभागीय आयुक्त यांच्याकडे पाठविली जाते. नंतर ती राज्य शासनाकडे पाठविली जाते. जाहीर केलेली मदत शेतकऱ्यांच्या आधार लिंक बँक खात्यात थेट जमा होईल, असे बिदरी यांनी सांगितले.