Adulterated Milk : साताऱ्यात दूध भेसळ करणाऱ्या २८ जणांवर कारवाई

Satara News : सातारा जिल्ह्यात दूध भेसळीचे प्रमाण वाढल्याचे दिसून येत आहे. दूध भेसळीला आळा घालण्यासाठी दूध व्यवसाय विभाग व अन्न औषध प्रशासन विभागाने धडक कारवाई सुरू केली आहे. महिनाभरात जिल्ह्यात भेसळ करणाऱ्या २८ जणांवर कारवाई केली असून तब्बल एक हजार ७०० लिटर दूध नष्ट केले.

राज्यासह जिल्ह्यात मागणी आणि दूध उत्पादनात मोठी तफावत आढळून आली आहे. तसेच राज्यभरात दुधात मोठ्या प्रमाणात भेसळ होत असल्याने शेतकऱ्यांच्या दुधाला रास्त प्रमाणात भाव मिळत नाही. याचबरोबर भेसळयुक्त दूध शरीरासाठी घातक असल्याने दूध भेसळीला आळा बसणे गरजेचे होते. या पार्श्‍वभूमीवर दूध व्यवसाय विभाग, अन्न औषध प्रशासन, वजन माप विभाग, पशुसंवर्धन विभागाने दूध भेसळीविरोधातील कारवाईची गती वाढवली आहे. गेल्या महिनाभरात दूध टँकरसह दूध पिशव्यांचीदेखील तपासणी सुरू आहे. यामध्ये काही संशयित वाटल्यास नमुने पुणे येथे प्रयोगशाळेत पाठविण्यात येतात.

नमुन्याचा अहवाल आल्यानंतर पुढील कार्यवाही केली जात आहे. गेल्या महिनाभरात जिल्ह्यात २०१ दूध डेअरी, दूध टँकरची तपासणी केली. त्यामध्ये आतापर्यंत एक हजार ६१० लिटर प्रशासनाने नष्ट केले. तसेच ७४ नमुने पुणे येथे प्रयोगशाळेत तपासणीसाठी पाठविले आहेत. याचबरोबर आतापर्यंत चार जणांवर गुन्हे दाखल झाले आहेत. तर नऊ जणांना नोटिसा देण्यात आल्या आहेत.