Lumpy Skin : परभणी जिल्ह्यातील ३०४४ जनावरे ‘लम्पी स्कीन’ बाधित

परभणी ः परभणी जिल्ह्यातील लम्पी स्कीन (Lumpy Skin) आजारामुळे बाधित जनावरांची संख्या बुधवार (ता. १४) अखेर ३ हजार ४४ पर्यंत वाढली. त्यापैकी १९८ जनावरे दगावली असून त्यात गायी २८, बैल ६६ आणि १०४ वासरांचा समावेश आहे. तर उपचारानंतर १ हजार ८०८ जनावरे बरी झाली आहेत. सध्या या आजाराच्या बाधित जनावरांपैकी ५८ जनावरे गंभीर आहेत, अशी माहिती जिल्हा पशुसंवर्धन उपायुक्त डॉ. पी. पी. नेमाडे यांनी दिली.

बुधवार (ता. १४ ) पर्यंत जिल्ह्यातील सर्व नऊ तालुक्यांतील १ हजार २०२ गायी आणि १ हजार ८४२ बैलांना या आजारांचा प्रादुर्भाव झाल्याचे आढळून आले आहे.जिल्ह्यात लम्पी स्कीन आजाराची ईपी सेंटर १४२ आहे. इपी सेंटरच्या ५ किलोमीटर परिघातील गावांची संख्या ६१८ झाली आहे. परभणी जिल्ह्यात एकूण जनावरांची संख्या ३ लाख ९८ हजार ३५६ होती. त्यात १ लाख ३७ हजार १५० गायवर्गीय, १ लाख ६२ हजार ७११ बैलवर्गीय आणि ९८ हजार ४९५ म्हैस वर्गीय जनावरांचा समावेश आहे.

जिल्ह्यातील १ लाख ३७ हजार १५० गाय वर्गीय आणि १ लाख ६२ हजार ७११ बैलवर्गीय असे एकूण २ लाख ९९ हजार ८६१ जनावरांच्या लसीकरणासाठी २ लाख ९९ हजार ३०० लसी प्राप्त झाल्या होत्या. जिल्ह्यातील गोशाळांतील ३ हजार ९९५ जनावरांचे लसीकरण करण्यात आले. जिल्ह्यात गोवर्गात केलेले स्वच्छ लसीकरण ३१ हजार २८९ आहे. बुधवार (ता. १४) पर्यंत १ लाख ३८ हजार ९१६ गायवर्गीय आणि १ लाख ५२ हजार ८६९ बैलवर्गीय आणि ५ हजार ६९ म्हशी असे एकूण २ लाख ९६ हजार ८५४ जनावरांचे (९८. ९९ टक्के) लसीकरण पूर्ण झाले आहे.