Satbara Nondi : सातबारांवरील कालबाह्य २६ हजार ८०० नोंदी काढल्या

जळगाव : जिल्ह्यात शेतकऱ्यांसह अनेक नागरिकांच्या सात-बारा (Satbara) उताऱ्यांवर अनेक कालबाह्य नोंदी अनेक वर्षांपासून होत्या. त्या काढण्यासाठी मागील वर्षात महसूल विभागाने (Revenue Department ) विशेष मोहीमच राबविली. त्यात एकूण ३२ हजार २५८ नोंदी शोधण्यात आल्या.

त्यातील २६ हजार ८०० कालबाह्य नोंदी काढून त्या कमी करण्यात आल्या आहेत. यामुळे शेतकऱ्यांना शेतीची खरेदी- विक्री करणे, कर्ज घेणे आदी प्रक्रिया सुलभ होणार आहे.

अनावश्‍यक नोंदी काढण्यासाठी शेतकऱ्यांना पूर्वी संबंधितांकडे अर्ज करावे लागत होते. सातबारा उताऱ्यावरील इतर अधिकारातील फेरफार नोंदी जसे, की तगाई बोजे, बंडिंग बोजे, सावकारांची नावे व बोजे, रद्द झालेल्या भूसंपादनाच्या नोंदी, आयटक बोजे,

अस्तित्वात नसलेल्या संस्था अथवा सोसायटीच्या बोज्यांच्या नोंदी कमी करण्यासाठी विशेष मोहीम राबविण्याबाबत नाशिक महसूल विभागीय आयुक्त राधाकृष्ण गमे यांनी निर्देश दिले होते.

त्यानुसार महसूल विभागाने २०२२ मध्ये मोहीम राबविली. जळगाव जिल्ह्यात एकूण १२ लाख १७ हजार ५८८ एवढे सात-बारा उतारे आहेत.

त्यापैकी ३२ हजार ९७४ एवढ्या सात-बारा उताऱ्यांवरील इतर अधिकारात तगाई, बंडिंग, सावकारी बोजे, नजरगहाण नोंदी शोधण्यात आल्या. २६ हजार ८०० कालबाह्य नोंदी सात-बारा उताऱ्यांवरून कमी केल्या आहेत.

सातबारा उताऱ्यावर कालबाह्य नोंदी अनेक वर्षांपासून होत्या. शेतजमिनीचे व्यवहार करताना या नोंदीची पडताळणी करण्यासाठी कालावधी लागत होता.

आता कालबाह्य नोंदी कमी झाल्याने शेतकऱ्यांना खरेदी, विक्रीचे व्यवहार सुलभरीत्या करता येतील.

- शुभांगी भारदे, उपजिल्हाधिकारी, महसूल, जळगाव

सातबारावरील कालबाह्य नोंदी स्थिती

तालुका कालबाह्य नोंदी

जळगाव १५२४

भडगाव १६०८

पाचोरा २३६६

चाळीसगाव २१३४

पारोळा ११९४

एरंडोल ५४९१

धरणगाव ९४६२

अमळनेर १८२९

चोपडा १३८०

यावल १०१२

भुसावळ २९८

बोदवड २२९

जामनेर २३५६

मुक्ताईनगर ५७६

रावेर ७९९

एकूण ३२२५८