Nashik ZP : जिल्हा परिषदेत आता १३८८ ग्रामपंचायती

Nashik News : ग्रामविकास विभागाने ३० जूनला जारी केलेल्या अधिसूचनेनुसार त्र्यंबकेश्वर तालुक्यातील वाघेरे ग्रामपंचायतीमधून गोधड्याचा पाडा ही स्वतंत्र ग्रामपंचायत स्थापन झाली आहे.

त्यानुसार त्र्यंबकेश्‍वर तालुक्यात ८४ ऐवजी ८५ व जिल्हा परिषदेत १३८७ ऐवजी १३८८ ग्रामपंचायती झाल्या आहेत. ही ग्रामपंचायत स्थापनेसाठी सर्व ग्रामस्थ, सरपंच, उपसरपंच, सदस्य व इगतपुरी-त्र्यंबकेश्‍वरचे आमदार हिरामण खोसकर यांची मागणी व पाठपुरावा सुरू होता.

ग्रामविकास विभागाच्या विविध आदेशांद्वारे तसेच, वाघेरे येथील ग्रामसभेत २६ नोव्हेंबर २०२१ ला वाघेरा ग्रामपंचायतीचे विभाजन करून गोधड्याचा पाडा स्वतंत्र ग्रामपंचायत स्थापन करण्याबाबत ठराव करण्यात आला होता. तसेच, त्र्यंबकेश्‍वर पंचायत समितीच्या गट विकास अधिकाऱ्यांनी शिफारस केली होती.

त्यानंतर जिल्हा परिषद, स्थायी समितीने १२ सप्टेंबर २०२२ ला स्वतंत्र ग्रामपंचायत स्थापन करण्याचा ठराव केला होता. हा प्रस्ताव विभागीय आयुक्तांकडे व त्यांच्यामार्फत शिफारशीने शासनास सादर झाला होता. स्वतंत्र ग्रामपंचायत स्थापन झाल्यामुळे स्वतंत्र कार्यकारिणी, ग्रामपंचायत कार्यालय, १५ वा वित्त आयोग व पेसा निधी स्वतंत्रपणे मिळणार आहे.

त्याचप्रमाणे यावर्षी नाशिक तालुक्यातील गंगाम्हाळुंगी या ग्रामपंचायतीमधून सुभाषनगर, बागलाण तालुक्यातील केळझर या ग्रामपंचायतीमधून तताणी व येवला तालुक्यातील शिरसगाव लौकी या ग्रामपंचायतीमधून लौकी शिरस अशा तीन ग्रामपंचायती स्थापन झाल्या आहेत, अशी माहिती जिल्हा परिषदेचे उपमुख्य कार्यकारी अधिकारी (ग्रामपंचायत) यांनी दिली.