Pre monsoon Rain: पुढील ४ दिवस वादळी पावसाचे; राज्यातील सर्वच जिल्ह्यांमध्ये वादळी पावसाचा इशारा

Pune News: राज्यातील वादळी पावसाचे वातावरण कायम आहे. मागील ३ दिवसांपासून काही ठिकाणी पडणाऱ्या पावसामुळे उन्हाचा चटकाही कमी झालेला दिसत आहे. हवामान विभागाने राज्यातील काही ठिकाणी पुढील ५ दिवस वादळी पावसाचा इशारा दिला आहे.

राज्यात मागील ३ दिवसांपासून विदर्भ, मराठवाडा, मध्य महाराष्ट्र आणि कोकणात वादळी पाऊस काही ठिकाणी हजेरी लावत आहे. त्यामुळे उन्हाळी पिकांसह फळपिकांचे नुकसान होत आहे. आंब्याचे मोठे नुकसान होत असल्याचे शेतकरी सांगत आहेत. शेटनेडसह, सोलार पॅनेल आणि घरांचेही नुकसान होत आहे. खानदेशत केळी आणि पपई, मराठवाड्यात मोसंबी, केशर आंब्याचे नुकसान होत आहे.

पश्‍चिम मध्य प्रदेश आणि परिसरावर समुद्र सपाटीपासून १.५ ते ७.६ किलोमीटर उंचीवर चक्राकार वाऱ्यांची स्थिती आहे. त्यापासून उत्तर महाराष्ट्र, कोकण ते अरबी समुद्रापर्यंत हवेचा कमी दाबाचा पट्टा सक्रिय आहे. हवामान विभागाने पुढील ४ दिवस विदर्भातील बुलडाणा, अकोला, अमरावती, वाशीम, यवतमाळ, वर्धा, नागपूर, चंद्रपूर, भंडारा, गोंदीया आणि गडचिरोली जिल्ह्यात काही ठिकाणी विजा आणि ढगांच्या गडगडाटासह वादळी पावसाचा इशारा हवामान विभागाने दिला.

पुढील ४ दिवस काही ठिकाणी पावसाचा अंदाज आहे. तर मराठवाड्यातील छत्रपती संभाजीनगर, जालना, परभणी, हिंगोली, बीड, धाराशिव, नांदेड आणि लातूर जिल्ह्यातही पुढील ४ दिवस काही ठिकाणी वादळी पावसाचा इशारा देण्यात आला. मध्य महाराष्ट्रातील पुणे, सातारा, सांगली, सोलापूर, कोल्हापूर आणि अहिल्यानगर तसेच नाशिक जिल्ह्यातही पावसाला पोषक हवामान आहे.

या जिल्ह्यांमध्ये पुढील ४ दिवस काही ठिकाणी वादळी पाऊस पडण्याचा अंदाज हवामान विभागाने दिला. खानदेशातील जळगाव, नंदूरबार आणि धुळे जिल्ह्यातही वादळी पावसाचा पोषक हवामान आहे. तर कोकणातील सिंधुदूर्ग, रत्नागिरी, रायगड, मुंबई, पालघर आणि ठाणे जिल्ह्यातही काही ठिकाणी वादळी वाऱ्यासह पावसाचा इशारा हवामान विभागाने दिला.