Hawaman Andaj : थंडीमुळे राज्याला हुडहुडी; राज्याच्या बहुतांशी भागातील कमान तापमानात घट कायम

Pune News : उत्तरेकडील थंड वाऱ्यांच्या प्रवाहामुळे राज्यातही थंडी वाढली आहे. राज्यातील बहुतांशी भागात हुडहुडी वाढली आहे. आज निफाड येथे सर्वात कमी १०.५ अंश सेल्सिअस तापमानाची नोंद झाली. तापमानातील घट कायम राहील, असा अंदाज हवामान विभागाने दिला.

भारत आणि श्रीलंकेच्या दरम्यान असलेल्या कोमोरिन भागात चक्राकार वाऱ्यांची स्थिती आहे. देशाच्या उत्तरेकडे थंडीचा कडाका वाढत आहे.

आज हरियानातील हिस्सार आणि राजस्थानमधील सिकर येथे देशाच्या सपाट भूभागावरील नीचांकी ८ अंश सेल्सिअस तापमानाची नोंद झाली.

राज्यातही गारठा वाढत आहे. आज निफाड येथील गहू संशोधन केंद्रात राज्यातील नीचांकी १०.५ अंश तापमानाची नोंद झाली. अनेक ठिकाणी किमान तापमान १५ अंशांपेक्षा खाली आले आहे. त्यामुळे राज्यात थंडीचा हंगाम सुरू झाला आहे.

रत्नागिरी येथे उच्चांकी ३४.७ अंश तापमानाची नोंद झाली. किमान तापमानात घट कायम राहून, राज्यातील गारठा वाढण्याचा अंदाज हवामान विभागाने वर्तविला आहे.