Weather Update : तापमानातील वाढ कायम राहणार

Weather News : पुणे : विदर्भ आणि मराठवाड्यात झालेल्या अवकाळी पावसाने उघडीप दिली असली तरी राज्यात ढगाळ हवामान, उन्हाचा चटका आणि उकाडा कायम आहे. किमान आणि कमाल तापमानात वाढ झाली आहे. फेब्रुवारी महिन्यातच उन्हाच्या झळा अनुभवायला मिळत आहेत. आज (ता. १५) राज्यात तापमानातील वाढ कायम राहण्याचा अंदाज हवामान विभागाने वर्तविला आहे.

राज्यात ढगाळ हवामान अनुभवायला मिळत असतानाच, उन्हाचा चटका आणि उकाडा वाढला आहे. बुधवारी (ता. १४) सोलापूर येथे राज्यातील उच्चांकी ३६.२ अंश सेल्सिअस तापमान नोंदले गेले. अनेक ठिकाणी कमाल तापमान ३३ अंशांच्या वरच आहे. निफाड येथे किमान तापमान ८.५ अंशांवर असून, उर्वरित राज्यात मात्र तापमान ११ अंशांच्या पुढे गेले आहे. आज (ता. १४) ढगाळ हवामान आणि तापमानातील वाढ कायम राहण्याची शक्यता आहे.

बुधवारी (ता. १४) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअस मध्ये) :
पुणे ३३.८ (१३.९), धुळे ३२.० (११.८), जळगाव ३३.६ (१४.२), कोल्हापूर ३३.४ (१८.६), महाबळेश्वर २८.५ (१६.०), मालेगाव ३३.२ (१६.०), नाशिक ३२.३ (१४.२), निफाड ३१.० (८.६), सांगली ३४.४ (१८.०), सातारा - (१४.४), सोलापूर ३६.२ (२०.६), सांताक्रूझ ३२.२ (१८.४), डहाणू ३०.० (२०.५), रत्नागिरी ३४.२ (१७.०), छत्रपती संभाजीनगर ३२.० (१५.६), नांदेड ३४.६ (१९.४), परभणी ३५.२ (१८.६), अकोला ३२.९ (१७.०), अमरावती ३२.२ (१७.१), बुलडाणा ३२.० (१६.०), ब्रह्मपुरी ३३.० (१८.०), चंद्रपूर ३२.२ (१७.४), गडचिरोली ३०.६ (१७.०), गोंदिया २९.६ (१७.८), नागपूर ३०.६(१७.८), वर्धा ३२.९(१८.४), वाशीम ३३.६ (१६.२), यवतमाळ ३३.७ (१८.२).

उत्तर भारतातील थंडी कमी
उत्तर भारतात थंडी कमी झाली आहे. पंजाबच्या अमृतसर येथे देशाच्या सपाट भूभागावरील नीचांकी ५.५ अंश सेल्सिअस तापमान नोंदले गेले. उत्तर प्रदेश, मध्य प्रदेश, छत्तीसगड, बिहार व झारखंड, ओडिशा, पश्चिम बंगाल, सिक्कीम राज्यात विजांसह पावसाची शक्यता आहे. यातच मध्य महाराष्ट्र आणि परिसरावर समुद्र सपाटीपासून ९०० मीटर उंचीवर चक्राकार वाऱ्यांची स्थिती आहे. यामुळे राज्यात ढगाळ हवामान कायम आहे.