Maharashtra Weather Update: राज्यात अनेक ठिकाणी सकाळी गारवा वाढला; सोलापुरात तापमानाचा पारा पोचला ३७ अंशांच्या पार 

Pune News: राज्यात सध्या सकाळी थंडी आणि दुपारी उन्हाचा चटका असे वातावरण दिसत आहे. सकाळी अनेक ठिकाणी किमान तापमान काही ठिकाणी १० ते १२ अंशाच्या दरम्यान राहत आहे.

तर दुपारचे तापमान काही ठिकाणी ३६ अंशांवर पोचले. यामुळे तापमानातील तफावत वाढलेले दिसते. आज निफाड येथील गहू संशोधन केंद्रात सर्वात कमी ७.२ अंश सेल्सिअस तापमानाची नोंद झाली तर सोलापूर येथे सर्वाधिक ३७.३ अंश सेल्सिअस तापमानाची नोंद झाली होती. 

उत्तर भारतातही तापमानातील चढ उतार सुरु आहेत. उत्तर भारतात अनेक ठिकाणी तापमाना सध्या १० अंशांच्याही खाली आहे.

आज पंजाबमधील आदमपूर येथे देशाच्या सपाट भूभागावरील नीचांकी ४.४ अंश सेल्सिअस तापमानाची नोंद झाली. उत्तर भारतात १२.६ किलोमीटर उंचीपर्यंत १३० नॉट्स वेगाने पश्‍चिमेकडील जोरदार वाऱ्यांचे प्रवाह कायम आहेत. त्याचा परिणाम थंडीवर दिसून येत आहे. 

राज्यातील तापमानातील चढ उतार आहेत. मागील दोन दिवसांपासून सकाळीच्या वेळेत गारवा काहीसा वाढला. राज्यातील अनेक भागात किमान तापमानात घट झाली आहे. तर दुपारी उन्हाचा चटकाही जाणवत आहे. राज्यातील अनेक ठिकाणी तापमानाचा पारा ३५ अंशांच्या पुढे गेला आहे. राज्यातील तापमानात चढ उतार कायम राहतील, असा अंदाज हवामान विभागाने दिला.