Maharashtra Rain : राज्यात पावसाचा जोर ओसरणार

Pune News : बंगालच्या उपसागरातील कमी दाब क्षेत्र ओसरू लागताच राज्यातील पावसाचा जोरदेखील कमी होण्याची शक्यता आहे. आज (ता. ११) कोकण, घाटमाथ्यासह विदर्भात तुरळक ठिकाणी जोरदार पावसाचा इशारा (येलो अलर्ट) आहे. उत्तर महाराष्ट्र, मराठवाडा आणि पश्‍चिम विदर्भात विजांसह पावसाची शक्यता आहे. उद्यापासून (ता. १२) राज्यात पावसाचा जोर ओसरण्याची शक्यता हवामान विभागाने वर्तविली आहे.

छत्तीसगड आणि परिसरावर असलेले तीव्र कमी दाबाचे क्षेत्र (डिप्रेशन) वायव्येकडे सरकत आहे. मंगळवारी (ता. १०) ही प्रणाली छत्तीसगडच्या विलासपूरपासून ७० किलोमीटर आग्नेयेकडे, रायपूरपासून १४० किलोमीटर पूर्वेकडे, मध्य प्रदेशच्या मालंजखंडपासून २२० किलोमीटर पूर्वेकडे होती. बुधवारी (ता. ११) सकाळपर्यंत या प्रणालीची तीव्रता आणखी ओसरणार आहे. मॉन्सूनचा आस असलेला कमी दाब पट्टा राजस्थानच्या बिकानेरपासून, कोटा, गुना, उमरिया, कमी दाबाचे केंद्र ते मध्य बंगालच्या उपसागरापर्यंत कायम आहे. दक्षिण गुजरात ते मध्य केरळपर्यंत किनारपट्टीला समांतर हवेचा कमी दाबाचा पट्टा तयार झाला आहे.

विदर्भात पावसाने हजेरी लावली असली तरी पावसाची उघडीप असलेल्या भागात उन्हाचा चटका वाढू लागला आहे. मंगळवारी (ता. १०) सकाळपर्यंतच्या २४ तासांमध्ये नागपूर आणि जेऊर येथे उच्चांकी ३४ अंश तापमानाची नोंद झाली. राज्यात बहुतांश ठिकाणी कमाल तापमानाचा पारा ३० ते ३४ अंशांच्या दरम्यान आहे. विदर्भात काही ठिकाणी मुसळधार, तर कोकण, मध्य महाराष्ट्र, मराठवाड्यात तुरळक ठिकाणी हलक्या ते मध्यम पावसाने हजेरी लावली आहे.

आज (ता. ११) कोकणातील रायगड, रत्नागिरी, सिंधुदुर्ग, मध्य महाराष्ट्राच्या नाशिक, पुणे, सातारा, कोल्हापूर, पूर्व विदर्भातील अमरावती, नागपूर जिल्ह्यांत जोरदार सरींचा इशारा (येलो अलर्ट) आहे. उत्तर महाराष्ट्र, मराठवाडा, पश्‍चिम विदर्भात तुरळक ठिकाणी विजांसह पावसाची शक्यता आहे. उद्यापासून (ता. १२) राज्याच्या बहुतांश भागात पावसाची उघडीप मिळण्याची शक्यता हवामान विभागाने वर्तविली आहे.

जोरदार पावसाचा इशारा (येलो अलर्ट) : रायगड, रत्नागिरी, सिंधुदुर्ग, नाशिक, पुणे, सातारा, कोल्हापूर, अमरावती, नागपूर.

विजांसह पावसाचा इशारा (येलो अलर्ट) : नंदुरबार, धुळे, जळगाव, छत्रपती संभाजीनगर, जालना, परभणी, हिंगोली, बुलडाणा, अकोला, वाशीम, वर्धा, यवतमाळ, भंडारा, गोंदिया, चंद्रपूर, गडचिरोली.