Monsoon 2023: माॅन्सून वाट अडखळलेलीच, राज्याच्या या भागांमध्ये आज पावसाचा अंदाज

Rain Update : आज सलग तिसऱ्या दिवशी माॅन्सूनची वाट अडखळली. देशाचा बहुतांशी भाग माॅन्सूनने व्यापल्यानंतरही पाऊस सक्रीय दिसत नाही. विशेषतः राज्यातील बहुतांशी भागांमध्ये पेरणीयोग्य पाऊस नाही. केवळ काही भागातच पावसाची हजेरी लागत आहे.

मागील काही दिवसांमध्ये माॅन्सूनने देशात वेगाने वाटचाल केली. विशेषतः शनिवार ते बुधवार या काळात माॅन्सूनने देशाचा बहुतांशी भाग व्यापला.

या काळात माॅन्सूनच्या वाटचालीसाठी पोषक हवामान होते. त्यामुळे माॅन्सून लगेच देश व्यापेल, असा अंदाज होता. पण तसं घडलं नाही. कारण आज सलग तिसऱ्या दिवशी माॅन्सूनची प्रगती झाली नाही. आजही माॅन्सून तीन दिवस एकाच जागेवर आहे. माॅन्सूनची सिमा आजही सिमा बिकानेर, नरनौल, फिरोजपूरपर्यंत होती.

माॅन्सूनने देशाचा बहुतांशी भाग व्यापला आहे. केवळ राजस्थानचा काही भाग माॅन्सूनने अद्याप व्यापायचा आहे. तसेच पंजाबचा थोडा भाग आणि हरियानाच्या काही भागात माॅन्सून पोचला नाही. बुधवारी माॅन्सूनने राजस्थानच्या काही भागात प्रगती केली होती. तसेच उत्तर अरबी समुद्राचा संपूर्ण भाग माॅन्सूनने व्यापला होता. तेव्हापासून माॅन्सून काय भागात आहे.

पण माॅन्सूनच्या वाटचालीसाठी सध्या पोषक हवामान असल्याचे हवामान विभागाने म्हटले आहे. पुढील दोन दिवसांमध्ये माॅन्सून राजस्थान, हरियाना आणि पंजाबचा उरलेला भाग व्यापेल. म्हणजेच संपूर्ण भारत दोन दिवसांमध्ये माॅन्सूनने व्यापलेला असेल, असा अंदाज हवामान विभागाने दिला.

आजही राज्यातील अनेक भागात पावसाने दडी दिली. आज राज्यातील कोकण आणि मध्य महाराष्ट्रातील अनेक भागात जोरदार पावसाचा अंदाज आहे. आज संपूर्ण कोकण तसेच पुणे आणि सातारा जिल्ह्यातील काही ठिकाणी जोरदार पावसाचा येलो अलर्ट हवामान विभागाने दिला.

यासोबत विदर्भात काही ठिकाणी पावसाच्या जोरदार सरी पडतील, असा अंदाज आहे. विदर्भातील बुलडाणा, अकोला, वाशिम, यवतमाळ, अमवरावती, नागपूर, वर्धा, गडचिरोली, भंडारा, गोंदीया या जिल्ह्यांमध्ये काही ठिकाणी जोरदार पावसाचा येलो अलर्ट हवामान विभागाने दिला.