Monsoon Rain Update: विदर्भात जोरदार पावसाचा अंदाज; मराठवाडा, मध्य महाराष्ट्रात जोर कमी राहणार

Pune News: विदर्भातील काही भागात जोरदार पावसाची नोंद झाली. मात्र मराठवाडा, मध्य महाराष्ट्र आणि कोकणातील बहुतांशी भागात पावसाचा जोर कमी झाला. पुढील ५ दिवस विदर्भात पावसाचा जोर राहण्याची शक्यता आहे. तर राज्याच्या इतर भागात पाऊस कमीच राहील, असाही अंदाज हवामान विभागाने दिला. 

माॅन्सून वाटचाल आजही थबकलेली होती. माॅन्सूनची अरबी समुद्रातील शाखा मागील ५ दिवसांपासून तर बंगालच्या उपसागरातील शाखा मागील ३ दिवसांपासून एकाच भागात होता. माॅन्सूनची सिमा आजही मुंबई, अहिल्यानगर, आदीलाबाद, भवानीपटना, पुरी आणि बालूरघाट भागात होती. 

माॅन्सूनने आज राज्यातील काही भागात पावसाचा अंदाज दिला. तसेच राज्यातील अनेक भागात पुढील ५ दिवस हलक्या ते मध्यम पावसाची शक्यताही वर्तविली. मराठवाड्यातील छत्रपती संभाजीनगर, जालना, परभणी, बीड, धाराशिव, लातूर, नांदेड आणि हिंगोली जिल्ह्यात पुढील ५ दिवस काही ठिकाणी हलक्या ते मध्यम पावसाचा अंदाज आहे. 

विदर्भातील अकोला, चंद्रपूर, वाशीम आणि बुलडाणा जिल्ह्यात मंगळवार आणि बुधवारी काही ठिकाणी जोरदार पावसाचा अंदाज आहे. पुढील ३ दिवस पावसाची उघडीप राहण्याची शक्यता आहे. अमरावती, वर्धा, नागपूर, गोंदीया, गडचिरोली आणि भंडारा जिल्ह्यात पुढील ५ दिवस काही ठिकाणी जोरदार पावसाची शक्यता आहे. नागपूर जिल्ह्यात आज तसेच सोमवारी आणि मंगळवारी पावसाचा अंदाज आहे. 

मध्य महाराष्ट्रातील पुणे, सातारा, सांगली, सोलापूर, कोल्हापूर, अहिल्यानगर जिल्ह्यातही काही ठिकाणी हलक्या ते मध्यम पावसाचा पुढील ५ दिवस अंदाज आहे. पावसाचा जोर कमीच राहणार आहे. कोकणातील सिंधुदूर्ग आणि रत्नागिरी जिल्ह्यात पुढील ३ दिवस काही ठिकाणी जोरदार पावसाचा अंदाज आहे. मात्र रायगड, पालघर, मुंबई आणि ठाणे जिल्ह्यात पुढील ५ दिवस हलक्या सरी काही ठिकाणी पडतील, असा अंदाज हवामानविभागाने दिला.