Paus Andaj: आठ जिल्ह्यांना गारपीटीचा इशारा; राज्यात ५ दिवस वादळी पावसाचा अंदाज

Pune News: राज्यात पावसाला पोषक हवामान झाले आहे. विदर्भ, मराठवाडा, खानदेशासह मध्य महाराष्ट्र आणि कोकणात वादळी पावसाचा अंदाज आहे. तसेच ८ जिल्ह्यांमध्ये आज गारपीटीचाही अंदाज देण्यात आला. राज्यात उन्हाचा चटकाही कायम राहील, असा अंदाज हवामान विभागाने दिला. 

विदर्भातील सर्वच जिल्ह्यांमध्ये काही ठिकाणी पावसाचा अंदाज आहे. यवतमाळ, गडचिरोली चंद्रपूर आणि अमरावती जिल्ह्यात पुढील ५ दिवस वादळी पावसाचा अंदाज आहे. तर अकोला, बुलडाणा, वर्धा, नागपूर, भंडारा, गोंदीया जिल्ह्यात तीन ते चार दिवस पावसाचा अंदाज आहे. यावेळी वादळी वारेही राहण्याची शक्यता आहे. 

मराठवाड्यातील धाराशिव, लातूर आणि नांदेड जिल्ह्यात काही ठिकाणी पुढील ५ दिवस विजा आणि ढगांच्या गडगडाटासह हलक्या ते मध्यम पावसाचा अंदाज आहे. यावेळी वादळी वारेही वाहण्याची शक्यता आहे. हिंगोली, बीड, परभणी, जालना आणि छत्रपती संभाजीनगर जिल्ह्यातही काही ठिकाणी वादळी वाऱ्यासह पावसाची शक्यता आहे. तर छत्रपती संभाजीनगर, जालना आणि बीड जिल्ह्यात काही ठिकाणी वादळी वाऱ्यासह गारपीटीचाही अंदाज हवामान विभागाने दिला.

मध्य महाराष्ट्रातील सोलापूर, सातारा, सांगली, कोल्हापूर, पुणे, नाशिक आणि अहिल्यानगर जिल्ह्यातही काही ठिकाणी पुढील ५ दिवस वादळी वाऱ्यासह पावसाचा अंदाज हवामान विभागाने दिला. तर सातारा, पुणे, अहिल्यानगर आणि नाशिक जिल्ह्यात काही ठिकाणी वादळी वाऱ्यासह गारपीटीचा अंदाज हवामान विभागाने दिला. तर खानदेशातील जळगाव, नंदूरबार आणि धुळे जिल्ह्यातही पुढील ३ दिवस काही ठिकाणी पावसाचा अंदाज आहे. जळगाव जिल्ह्यात गारपीटीचीही शक्यता आहे. 

सिंधुदूर्ग, रत्नागिरी, रायगड, मुंबई, ठाणे आणि पालघर जिल्ह्यातही काही ठिकाणी पुढील ३ दिवस वादळी वाऱ्यासह पावसाचा अंदाज हवामान विभागाने दिला. तसेच राज्यात उन्हाचा चटकाही कायम राहील, अशी शक्यता हवामान विभागाने वर्तविली आहे.