Maharashtra Rain : राज्यात थंडीला पोषक स्थिती; उत्तर भारतात थंडीची लाट कायम

Pune News : राज्याच्या बहुतांशी भागात किमान तापमानात घट दिसून आली. त्यामुळे थंडीही वाढली आहे. तर उत्तर भारतातील अनेक भागात थंडी कायम असून काही भागात धुक्याची लाटही कायम आहे. 

उत्तर भारतातील अनेक भागात किमान तापमान कमीच आहे. पंजाब, हरियाना, चंदीगड, दिल्लीच्या बहुतांशी भागात किमान तापमान २ ते ५ अंशाच्या दरम्यान होते. तर उत्तर प्रदेश, राजस्थान, उत्तर मध्य प्रदेश, बिहार, उत्तर प्रदेश, झारखंडच्या बहुतांशी भागात किमान तापमान ६ ते १० अंशाच्या दरम्यान होते.

तर ईशान्य भारत आणि शेजारच्या भागात किमान तापमान १ ते ४ अंशाच्याही पातळीवर पोचले होते. हरियानातील हिस्सार येथे सर्वात कमी १.१ अंश तापमानाची नोंद झाली. 

उत्तर भारतात पुढील ५ दिवस दाट ते अतिदाट धुक्याची चादर कायम राहील. तर पुढील २ दिवस उत्तर भारतात अतिथंडी राहू शकते. त्यानंतर थंडी कमी होत जाईल. तसेच पुढील पाच दिवस ईशान्य भारतात अतिथंडीची लाट दिसू शकते, असा अंदाज हवामान विभागाने दिला. 

महाराष्ट्रातील अनेक भागात थंडी परतल्याचे दिसते. बहुतांशी भागांमध्ये किमान तापमानात घट दिसून आली. कमाल तापमानाची पातळी मात्र कायम राहिल्याचे दिसते. राज्यातील अनेक भागात पुढील काही दिवस थंडी कायम राहू शकते, असाही अंदाज हवामान विभागाने दिला.