Monsoon Rain : विदर्भातील ३ दिवस पावसाचा अंदाज; राज्याच्या बहुतांशी भागात पाऊस उघडीप देण्याची शक्यता

Pune News : राज्याच्या अनेक भागात आज पावसाची उघडीप पाहायला मिळाली. तर काही भागात ढगाळ वातावरण आणि हलक्या पावसाच्या सरी होत्या. हवामान विभागाने पुढील ४ दिवस काही भागात पावसाचा अंदाज व्यक्त केला आहे. 

हवामान विभागाने उद्या विदर्भातील बुलडाणा, अकोला, वाशीम, अमरावती, यवतमाळ, नागपूर, वर्धा, चंद्रपूर, गडचिरोली, भंडारा आणि गोंदीया जिल्ह्यात काही ठिकाणी जोरदार पावसाचा येलो अलर्ट दिला.

तसेच मराठवाड्यातील छत्रपती संभाजीनगर, जालना, परभणी, नांदेड आणि हिंगोली तेसच मध्य महाराष्ट्रातील कोल्हापूर, सातारा आणि पुणे कोकणातील सिंधुदूर्ग, रत्नागिरी आणि रायगड जिल्ह्यातही काही ठिकाणी जोरदार पावसाचा अंदाज आहे. मराठवाडा आणि मध्य महाराष्ट्रातील इतर भागात हलक्या ते मध्यम पावसाचाही अंदाज हवामान विभागाने दिला. 

गुरुवारी विदर्भावातील सर्वच जिल्ह्यांमध्ये तसेच कोकण, मध्य महाराष्ट्रातील सातारा, पुणे, नगर, नाशिक, धुळे आणि जळगाव जिल्ह्यातही काही ठिकाणी जोरदार पावसाचा येलो अलर्ट हवामान विभागाने दिला. तर छत्रपती संभाजीनगर, जालना आणि परभणी जिल्ह्यातही काही भागात मध्यम सरी पडतील, असा अंदाज आहे. 

शुक्रवारी विदर्भातील बुलडाणा, अकोला, अमरावती, यवतमाळ, वाशीम, वर्धा, चंद्रपूर, नागपूर, गडचिरोली, भंडारा आणि गोंदीया जिल्ह्यात काही ठिकाणी जोरदार पावसाचा अंदाज हवामान विभागाने दिला. तर पुणे, रायगड आणि ठाणे जिल्ह्यातही काही ठिकाणी जोरदार पावसाचा येलो अलर्ट हवामान विभागाने दिला. शनिवारी राज्याच्या बहुतांंशी भागात पावसाची उघडीप राहण्याचा अंदाज आहे.