Turmeric Price: हळदीचा बाजार स्थिरावला; कोबी, केळी आणि कापसाचे आजचे दर काय?

हळदीच्या भावात मागील काही दिवसांपासून काहीसे चढ उतार सुरु आहेत. सध्या हळदीला सरासरी प्रतिक्विंटल १२ हजार ते १३ हजार रुपयांच्या दरम्यान भाव मिळत आहे. बाजारातील हरभरा आवक काहीशी कमी होताना दिसत आहे. आवक कमी झाली तशी हरभरा दरातही सुधारणा दिसून येत आहे. सध्या बाजारात हरभरा ५ हजार ४०० ते ५ हजार ७०० रुपयांच्या दरम्यान विकला जात आहे. मागील दोन आठवड्यांपासून केळीचे दर स्थिर दिसत आहेत. केळी बागांची काढणी वेगाने सुरु आहे. त्यामुळे बाजारातील केळीची आवक वाढली आहे. बाजारात केळी सध्या सरासरी १ हजार ४०० ते १ हजार ७०० रुपयांच्या दरम्यान विकली जात आहे. बाजारात कोबीची आवक चांगली सुरु आहे. वाढत्या आवकेमुळे कोबीचे दर सध्या बाजारात ४०० ते ७०० रुपयांच्या दरम्यान दिसत आहेत. कापसाचे भाव मागील दीड महिन्यापासून एकाच भावपातळीच्या दरम्यान दिसत आहे. सध्या कापसाला सरासरी ७ हजार ४०० ते ७ हजार ८०० रुपयांच्या दरम्यान भाव मिळत आहे.