Onion Price: कांद्याचे दर स्थिर; तसेच काय आहेत काकडी, दोडका, गहू आणि तुरीचे आजचे बाजारभाव

onion market price: देशातील बाजारात कांद्याची आवक चांगली आहे. मागणीच्या तुलनेत पुरवठा होत असल्याने कांद्याचे भाव मागील ५ दिवसांपासून काहिसे स्थिर आहेत. लासलगाव बाजारात आज कांद्याला सरासरी १५०० रुपये दर मिळाला. तर कमाल भाव २१०१ रुपये होता. पुणे बाजारातही सरासरी दर १३०० रुपये तर चांगल्या कांद्याला २ हजार रुपये भाव होता. राज्यातील बाजारात मागील काही आठवड्यापासून काकडीची आवक कमी होत आहे. तर दुसरीकडे काकडीला उठावही मिळत आहे. बाजारातील आवक मर्यादीत असल्याने सध्या काकडी १८०० ते २ हजार रुपये प्रतिक्विंटलने विकली जात आहे. बाजारातील दोडक्याची आवक मोठ्या प्रमाणात कमी झाली. तर दोडक्याला चांगला उठाव आहे. आवक कमी आणि चांगली मागणी यामुळे दोडक्याचा बाजार ४ हजार ते ५ हजार रुपये प्रतिक्विंटलच्या दरम्यान पोचला. देशातील बाजारात नव्या मालाची आवक आणि सरकारने लादलेले स्टाॅक लिमिट यामुळे गव्हाचे भाव स्थिरावले आहेत. गव्हाचे भाव मागील महिनाभरात जवळपास २०० रुपयांनी कमी झाले आहेत. सध्या गहू २ हजार २०० ते २ हजार ५०० रुपयांच्या दरम्यान विकला जात आहे. तुरीच्या बाजारातील मंदी कायम आहे. वाढत्या आयातीमुळे देशात तुरीची उपलब्धता चांगली आहे. सध्या बाजारात तूर प्रतिक्विंटल सरासरी ६ हजार ५०० ते ६ हजार ९०० रुपयांच्या दरम्यान विकली जात आहे.