Ajit Pawar: शेतकरी, महिलांना दादांचे गिफ्ट ?

Budget: सर्वात महत्वाची घोषणा आहे कापूस आणि सोयाबीन उत्पादकांना हेक्टरी ५ हजार रुपये अनुदानाची. मागील वर्षी आंतरराष्ट्रीय घडामोडी व अन्य कारणांमुळे झालेल्या किंमतीतील घसरणीमुळे शेतकऱ्यांना नुकसान सोसावे लागले. शेतकऱ्यांना दिलासा देण्यासाठी खरीप पणन हंगाम २०२३-२४ मध्ये कापूस व सोयाबीन उत्पादक शेतकऱ्यांना दोन हेक्टरच्या मर्यादेत प्रति हेक्टरी ५ हजार रुपयांचे अर्थसहाय्य देण्याची घोषणा केली. राज्यात सध्या दुधाचे भाव कमी झाले. त्यामुळे शेतकरी चांगल्या भावासाठी आंदोलन करत आहेत. दूध उत्पादकांना दिलासा देण्यासाठी प्रतिलिटर पाच रुपयांप्रमाणे अनुदान देण्याची योजना जुलै २०२४ पासून पुढे चालू ठेवण्यात येईल, अशी घोषणाही अर्थमंत्र्यांनी केली. तर आतापर्यंत दूध उत्पादकांना प्रतिलिटर ५ रुपयांप्रमाणे २२३ कोटी ८३ लाख रुपये अनुदान वितरित केल्याचेही त्यांनी सांगितले.