PM Kisan : पंचाहत्तर हजार शेतकरी वंचित राहणार

Jalgaon News : खानदेशातील सुमारे ७५ हजार खातेधारक शेतकरी प्रधानमंत्री किसान सन्मान निधीपासून केवायसीची पूर्तता न केल्याने या निधीपासून वंचित राहणार आहेत.

याबाबत शेतकऱ्यांना केवायसीबाबत सतत आवाहन करण्यात आले. परंतु केवायसी होऊ शकली नाही. कारण खानदेशात अनेक शेतकरी सातपुड्यातील दुर्गम पाड्यांवर राहतात. त्यांना कृषी विभागाने सहकार्य केले नाही.

कारण कृषी विभागाकडे या योजनेचे काम दिले, पण कृषी सहायक, मंडळ अधिकारी, तालुका कृषी अधिकाऱ्यांकडे योजनेच्या पोर्टलवर निर्णय घेण्यासाठी किंवा नोंदणी, मंजुरी यासाठीचे आवश्यक आयडी-पासवर्ड नाहीत.

काही राजकीय पक्षांनी योजनेसंबंधी जनजागृती केली. जाहिराती केल्या, पण प्रत्यक्ष शेतकऱ्यांकडे ही मंडळी पोचलीच नाही. यामुळे देखील शेतकरी या योजनेपासून वंचित राहिले आहेत.

अनेक शेतकऱ्यांनी अर्ज दाखल केले, ते अर्ज नामंजूर झाले. पण ते का नामंजूर झाले, याची उत्तरे मिळत नाहीत. यामुळेही संताप आहे. तहसीलदार कार्यालयात कुणी एेकून घेत नाही. तेथून कृषी विभागाकडे जा, असे सांगितले जाते. शेतकऱ्यांना हकनाक मनस्ताप सहन करावा लागत आहे.

२०१९ नंतर अनेकांनी शेत जमीन खरेदी केली. काहींना वारसा हक्काने त्यांच्या वडिलांनी जमीन स्वमर्जीने हयात असताना दिली. अशा जमीनधारकांचे अर्ज पोर्टलवर मंजूर होत नसल्यानेही अडचण आहे.

काही शेतकऱ्यांचे आधार क्रमांक अपडेट नाहीत, बॅँक अकाउंट व नावाची अडचणही कायम आहे. ही दुरुस्ती शेतकरी कृषी विभागात जाऊन करून घेऊ शकत नाहीत. कारण कृषी विभाग याबाबतचे कामच करीत नाही. फक्त घोषणाबाजी सुरू आहे, असा मुद्दाही शेतकरी उपस्थित करीत आहेत.

खानदेशातील सुमारे साडेसहा लाख शेतकरी किंवा खातेधारक शेतकरी या योजनेतून निधी मिळण्यासंबंधी पात्र ठरले आहेत. त्या जळगाव जिल्ह्यातील चार लाख ५१ हजार शेतकऱ्यांचा समावेश आहे.

‘नमो निधी’ पुढील महिन्यात

किसान सन्मान निधी वितरण करताना राज्य शासनाने घोषित केलेल्या नमो किसान सन्मान निधीतून शेतकऱ्यांना या महिन्यात पैसे दिलेले नाहीत. हा निधी पुढील महिन्यात येणार आहे. ज्यांची केवायसी अपूर्ण आहे, ते शेतकरी राज्य शासनाच्या नमो सन्मान निधीपासूनही वंचित राहणार आहेत.