अमरावती : ‘‘महात्मा गांधी ग्रामीण रोजगार हमी (मनरेगा) (MGNREGA) योजनेतून गावांचा शाश्वत विकास साधणारी विकासकामे प्राधान्याने राबवावीत,’’ असे निर्देश ‘मनरेगा’चे आयुक्त शंतनू गोयल (MGNREGA Commissioner Shantanu Goyal) यांनी येथे दिले.
तिवसा तालुक्यातील सार्सी, पालवाडी येथे योजनेतून झालेल्या कामांची प्रत्यक्ष पाहणी आयुक्तांनी केली. या वेळी त्यांनी योजनेचे लाभार्थी व मजूरांशी संवाद साधला.
सरपंच रीना मंजू, उपजिल्हाधिकारी राम लंके, तिवसाचे तहसीलदार वैभव फरताडे, गटविकास अधिकारी चेतन जाधव, ग्रामसेवक जी. के. मांगरुळकर आदी उपस्थित होते.
गोयल म्हणाले, ‘‘ग्रामीण नागरिकांचे राहणीमान उंचावेल व गावाची कायमस्वरूपी मालमत्ता निर्माण होईल, या दृष्टीने योजनेच्या माध्यमातून पायाभूत सोयींची कामे प्राधान्याने करावीत."
"जलसंधारण व जलसंवर्धन, दुष्काळ प्रतिबंधक कामे, वनीकरण व वृक्ष लागवड, जलसिंचन कालव्यांची कामे, पूरसंरक्षणाची कामे, पाणथळ क्षेत्रात चाऱ्याची कामे, बारमाही जोडरस्त्यांची कामे करावीत."
"गावांच्या सर्वांगीण विकासासाठी व गावपातळीवर रोजगार मिळवून देण्यासाठी मनरेगा योजना महत्त्वपूर्ण आहे. त्यामुळे अधिकाधिक कामे राबवावीत. आवश्यक कामांसाठी आराखडा तयार करून परिपूर्ण प्रस्ताव मान्यतेसाठी विहित मुदतीत सादर करावेत.’’
‘मनरेगा’तून सार्सी गावात निर्माण करण्यात आलेले जनावरांचे गोठे, शेतातील विहीर बांधकाम तसेच पालवाडी गावातील जिल्हा परिषद शाळेच्या संरक्षणासाठी भिंत बांधकाम, वृक्ष लागवड आदी कामांची पाहणी आयुक्तांनी केली.
लाभार्थी व मजुरांशी संवाद साधून त्यांनी कामाची माहिती व मजुरांच्या अडचणी जाणून घेतल्या. वैयक्तिक विहीर बांधकामांद्वारे शेत परिसरातील पाण्याच्या पातळीत वाढ झालेली दिसून येत आहे. शेतीपिकांचे उत्पादनात वाढ झाली आहे. जलसंधारणाची कामे मोठ्या प्रमाणावर राबवावीत,’’ अशी सूचना गोयल यांनी केली.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
