Micro Irrigation Scheme : सूक्ष्म सिंचनासाठी ‘महाडीबीटी’वर केलेले अर्ज महिनोन् महिने पडून

Agriculture Scheme Update : सूक्ष्म सिंचन, यांत्रिकीकरणाचे लाभार्थी निवडीसाठी सुरू केलेल्या ‘महाडीबीटी’मुळे शेतकऱ्यांना सुविधा निर्माण झाल्याचा दावा होत असला तरी अनेक अर्ज महिनोन् महिने पडून राहत असल्याची वस्तुस्‍थिती समोर आली आहे.

जिल्ह्यातील अनेक शेतकऱ्यांचे अर्ज वर्षभरापासून लॉटरीमध्ये निवड झालेली नसल्याने तसेच पडून आहेत. या शेतकऱ्यांना किमान हंगामाच्या तोंडावर तरी निवड होऊन पूर्वसंमती मिळेल, अशी आशा लागलेली आहे.

सूक्ष्म सिंचन योजनेचा लाभ घेण्यासाठी शेतकऱ्यांना महाडीबीटी पोर्टलवर अर्ज करावा लागतो. लॉटरीद्वारे यात लाभार्थ्यांची निवड व पूर्वसंमती अशी प्रक्रिया राहत असल्याचे सांगितले जाते.

लॉटरी काढताना विविध निकषांना प्राधान्य देऊन लाभार्थ्यांची निवड होत असते. सूक्ष्म सिंचन, यांत्रिकीकरणासाठी महाडीबीटीवर राज्यात मोठ्या संख्येने अर्ज दाखल होत असतात.

मात्र या निवड प्रक्रियेत अनेकांचे नाव महिनोन् महिने निवडल्या जात नसल्याची वस्तुस्थिती आहे. कधी कधी तर नव्याने अर्ज दाखल केलेल्यांची निवड होऊन त्यांना लाभही मिळतो. तर अनेक जुने अर्जदार आपला नंबर लागेल याची प्रतीक्षा करीत थांबलेले राहतात. यामध्ये गरजवंत शेतकरीसुद्धा आहेत.

आता खरीप हंगाम सुरू होत आहे. यासाठी सूक्ष्म सिंचनाचा लाभ मिळणे आवश्यक आहे. पोर्टलवर शेकडो अर्ज असे पडून आहेत. पण लॉटरीमध्ये नावच येत नसल्याने त्यांच्यासमोर पर्यायही नाही. या दृष्टीने शासनस्तरावर विचार होण्याची मागणी शेतकरी करीत आहेत.