Crop Insurance : मराठवाड्यात ४१ लाख हेक्टर क्षेत्र विमा संरक्षित

Chhatrapati Sambhajinagar News : मराठवाड्यातील आठही जिल्ह्यात खरिपाचा पीकविमा उतरविण्याचे काम गतीने सुरू आहे. परंतु या विमा उतरविण्याच्या कामात सर्वर डाउन होण्यासह इतर अडचणींनी खोडा घालण्याचे काम सुरूच ठेवले आहे.

मराठवाड्यातील आठही जिल्ह्यात शुक्रवारपर्यंत (ता. २९) ७४ लाख ६०३ शेतकऱ्यांनी पीकविमासाठी अर्ज सादर केले.

त्यामधून जवळपास ४१ लाख ९६ हजार १८७ हेक्टर क्षेत्र विमा संरक्षित झाले आहे. त्यामध्ये छत्रपती संभाजीनगर, जालना, बीड या तीन जिल्ह्यातील १६ लाख ४७ हजार ९५६ हेक्टर क्षेत्रासह लातूर, धाराशिव, नांदेड, परभणी, हिंगोली या पाच जिल्ह्यातील २५ लाख ४८ हजार २३१ हेक्टर क्षेत्राचा समावेश आहे. प्रति अर्ज एक रुपया याप्रमाणे शेतकऱ्यांकडून आठही जिल्ह्यात ७४ लाख १६२ रुपये शेतकरी हिस्सा जमा झाला आहे.

त्यामध्ये छत्रपती संभाजीनगर विभागीय कृषी सहसंचालक कार्यालय अंतर्गत तीन जिल्ह्यातील ३६ लाख १७ हजार ३६२ रुपये तर लातूर विभागीय कृषी सहसंचालक कार्यालय अंतर्गत पाच जिल्ह्यातील ३७ लाख ८३ हजार ८०० रुपयांचा समावेश आहे.

अनेकदा सर्वर डाऊनच्या तक्रारी आल्यानंतर त्यावर कृषी विभाग व संबंधित यंत्रणांकडून लक्ष देण्यात आले. परंतु शुक्रवारी रात्रीपासून पुन्हा एकदा सर्वर डाऊन, गट नंबर, खाते नंबर टाकल्यानंतर शेतकरी व्हेरिफाय न होणे, प्रक्रिया पूर्ण होण्यासाठी तासन्‌तास ताटकळावे लागणे हे प्रकार सातत्याने घडत आहेत.

अजूनही अनेक शेतकऱ्यांचा पीकविमा उतरविणे बाकी आहे. जाफराबाद तालुक्यातील सिताफळ उत्पादकांचा मंडळ विमा कक्षेत येण्यासाठीचा प्रश्न कायम आहे. सीएससी सेंटर चालकांना शेतकऱ्यांची कागदपत्रे पीकविमा उतरविण्यासाठी घेऊन ठेवावी की कशी, कारण मुदतीत विमा उतरविला गेला नाही तर शेतकऱ्यांचा रोष ओढ होऊ शकतो असा प्रश्न पडतो आहे. त्यामुळे निर्माण होत असलेल्या तांत्रिक अडचणी पाहता ३१ जुलै पूर्वी शेतकऱ्यांना आपल्या शेती पिकाचा विमा उतरवू देतील का हा खरा प्रश्न आहे.