Orchard planting : परभणीत फळबाग लागवडीसाठी २ कोटी ७९ लाखांची तरतूद

परभणी ः भाऊसाहेब फुंडकर फळबाग लागवड (Orchard planting) योजनेअंतर्गत २०२२-२३ या वर्षासाठी परभणी जिल्ह्यासाठी २ कोटी ७९ लाख रुपये निधीची तरतूद करण्यात आली आहे. इच्छुक शेतकऱ्यांना बुधवार (ता. ३०) पर्यंत महाडीबीटी पोर्टलवर अर्ज करता येतील, अशी माहिती जिल्हा अधीक्षक कृषी अधिकारी विजय लोखंडे यांनी दिली.

या योजनेअंतर्गत यंदा सर्वसाधारण प्रवर्गातील शेतकऱ्यांसाठी २ कोटी ६७ लाख ८९ हजार रुपये, अनुसूचित जाती प्रवर्गातील शेतकऱ्यांसाठी १० लाख ३२ हजार रुपये, अनुसूचित जमाती प्रवर्गातील शेतकऱ्यांसाठी १ लाख ३४ हजार रुपये यानुसार एकूण २ कोटी ७९ लाख ५५ हजार रुपये एवढा आर्थिक लक्षांक प्राप्त झालेला आहे.

त्यात खड्डे खोदणे, कलमे रोपे लागवड करणे,पीक संरक्षण,नांग्या भरणे व ठिबक सिंचनाव्दारे पाणी देणे या बाबीकरीता १०० टक्के अनुदान देय आहे. लाभार्थ्यास तीन वर्षाच्या कालावधीत ५०:३०:२० प्रमाणे अनुदान अदा करण्यात येईल. फळबाग लागवडीकरीता किमान ०.२० हेक्टर ते कमाल ६.०० हेक्टर क्षेत्र मर्यादा आहे.

या योजनेचा लाभ घेण्यासाठी सर्व इच्छुक शेतकऱ्यांनी महाडिबीटी पोर्टलचे https://mahadbt mahait.gov.in/ या संकेतस्थळावर बुधवार (ता. ३०) पर्यंत अर्ज करावेत. अर्जासोबत अद्यावयवत ७-१२ उतारा आणि ८-अ उतारा, सामाईक क्षेत्र असलेल्या लाभार्थी शेतकऱ्यांनी इतर खातेदारांचे सहमती पत्र सादर करावे. आधार कार्ड, आधार लिंक बँक खाते क्रमांक, कागदी लिंबू, संत्रा, मोसंबी या लिंबुवर्गीय फळपिकांच्या लागवडीकरीता माती परिक्षण अहवाल कागदपत्राबरोबर अपलोड करावा.

अधिक माहितीसाठी तालुका कृषी अधिकारी, मंडळ कृषी अधिकारी, कृषी पर्यवेक्षक, कृषी सहाय्यक यांचेशी संपर्क साधण्याचे, आवाहन जिल्हा अधिक्षक कृषी अधिकारी विजय लोखंडे यांनी केले आहे.

या फळपीकांसाठी मिळणार अनुदान...

यामध्ये आंबा, काजू, पेरू, डाळिंब, कागदी लिंबू, मोसंबी, संत्रा, नारळ, सीताफळ, आवळा, चिंच, जांभुळ, कोकम, फणस, अंजीर, चिकू अशा एकूण १६ फळपीकांचा समावेश करण्यात आला आहे.