Organic Honey: मधामध्ये जीवनसत्त्वे, खनिजे, भरपूर प्रमाणात असतात. मध हा शक्तिवर्धक असून, उत्तम अँटिऑक्सिडेंट म्हणूनही काम करतो. सर्दी, खोकल्यापासून ते अनेक दुर्धर आजारांवर मधाचा उपयोग केला जातो. अनेक आयुर्वेदिक औषधांमध्ये मधाचा वापर होतो, तर काही औषधे ही मधासोबत घेतली जातात. आपल्या देशाच्या विविध भागांत स्थानिक नागरिकांकडून नैसर्गिकरीत्या मध गोळा केला जातो. काही शेतकरी शेतात मधाच्या पेट्या ठेवून व्यावसायिक पद्धतीने मध उत्पादन घेतात. .देशात मधाची मोठी बाजारपेठ आहे. देशांतर्गत बाजारात दर्जानुसार प्रति किलो ७०० ते १८०० रुपये मधाला दर मिळतो. मध उत्पादक, प्रक्रियादार तसेच ग्राहक या सर्वांसाठी महत्त्वाच्या अशा मधामधील रासायनिक, जैविक घटक, जीवनसत्त्वे, मधाचे औषधी गुणधर्म याबाबत देशात आतापर्यंत संशोधनात्मक काम झाले नव्हते. त्यामुळे याबाबतची नेमकी माहिती, आकडेवारी आपल्याकडे उपलब्ध नव्हती..Sahyadri Jamun Honey: सह्याद्रीतील जांभूळ मधाचे वैज्ञानिकदृष्ट्या औषधी गुणधर्म सिद्ध ; ‘एनसीएल’चे संशोधन.अशा वेळी पुण्यातील ‘राष्ट्रीय रासायनिक प्रयोगशाळे’ने (एनसीएल) खादी ग्रामोद्योग मंडळाच्या पुढाकाराने भारतीय मधाचे प्रथमच रासायनिक विश्लेषण केले. यामध्ये त्यांना सह्याद्रीतील जांभूळ मध हा मनुका मधाच्या तुलनेत अनेक अंगाने सरस आढळून आला आहे..मनुका हा न्यूझीलंडचा उच्च प्रतीचा मध ब्रॅंड आहे. या मधामध्ये मिथाइल ग्रायऑक्सलचे (एमजीओ) प्रमाण अधिक आहे. मधातील एमजीओ पातळी जेवढी अधिक तेवढा तो मध प्रभावी अन् गुणकारी मानला जातो आणि त्यानुसार त्याचे दरही ठरतात. न्यूझीलंडने मनुका मधाचे रासायनिक विश्लेषण करून त्यानुसार त्याचे जगभर ब्रॅंडिंग केले. एमजीओच्या प्रमाणानुसार भारतात मनुका मध १४ हजार ते ४० हजार रुपये प्रति किलो अशा दरात मिळतो आणि गरजेनुसार ग्राहक खरेदीदेखील करतात..Maharashtra Fruit Farming: द्राक्ष, डाळिंब, केळीत भविष्य उज्ज्वल.एनसीएलच्या संशोधनात मनुका मधापेक्षा सह्याद्रीतील जांभूळ मधात साखरेचे प्रमाण कमी आणि औषधी गुणधर्म अधिक आढळून आले असल्याने या संशोधनाचे महत्त्व आपल्या लक्षात यायला हवे. गोड पदार्थांत मधुमेहींना चालणारे फारसे पर्याय उपलब्ध नाहीत. अशा वेळी जांभूळ मध मधुमेहींसाठी चालणार असल्याची शक्यता वर्तविली जात आहे. या संशोधनातून भारतीय मधाची मूल्य क्षमता आपल्याला कळण्यास मदत झाली आहे. या मूल्य क्षमतेचे व्यावसायिक रूपांतर आपल्याला करावे लागणार आहे..भारतभरातून एकूण १२ प्रकारचे मध संशोधनासाठी घेतले होते. त्यापैकी आठ प्रकारांचा अभ्यास पूर्ण झाला असून तीन प्रकारच्या मधाचा शोधनिबंध प्रसिद्ध झाला आहे. यावरून हेच स्पष्ट होते की ही सुरुवात असून वैविध्यपूर्ण गुणवैशिष्ट्य असलेले अजून काही मधाचे प्रकार पुढे आले तर आश्चर्य वाटायला नको. असे झाल्यास देशाच्या विविध भागांत रोजगारासाठी एक नवे क्षेत्रच खुले होणार आहे..Wild Honey Collection: तरुणांनी रानमधातून शोधली रोजगाराची वाट!.आता आपला यापुढील टप्पा म्हणजे जांभूळ मधाचे उत्पादन वाढवून, त्यावर प्रक्रिया, योग्य प्रकारे ब्रॅंडिंग करावे लागेल. जांभूळ मधाचा दर्जानुसार दर ठरवून तो देशांतर्गत तसेच जगाच्या बाजारपेठेत पोहोचवावा लागणार आहे. यासाठी दुर्गम भागातील आदिवासी बांधव, शेतकरी, प्रक्रियादार, विक्री-निर्यातदार, खादी ग्रामोद्योग मंडळ, संशोधन संस्था, अपेडा तसेच केंद्र-राज्य सरकार यांना एकत्रित प्रयत्न करावे लागणार आहेत..खादी ग्रामोद्योग मंडळाच्या पुढाकाराने प्रत्येक जिल्ह्यात मधाचे गाव विकसित करण्यात येत आहे. या संशोधनाला अनुसरून जांभूळ मध उत्पादनांसाठी काही शेतकरी, गावांनी उत्सुकता दाखविल्यास त्यांना आर्थिक-तांत्रिक सहकार्य करण्यास खादी ग्रामोद्योग मंडळ तयार आहे. आता गरज आहे ती अधिकाधिक शेतकरी तसेच गावांनी पुढे येण्याची!.ॲग्रोवनचे सदस्य व्हाशॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
