‘कोरोना’चा सामना करण्यासाठी ११ हजार कृषी सहायकांनी दिले वेतन

अकोला  ः कोरोना विषाणूच्या प्रादुर्भावामुळे उदभवलेली परिस्थिती पाहता शासनास सहाय्य म्हणून राज्यातील कृषी सहायकांनी मानवतेच्या दृष्टीने आपले एक दिवसाचे वेतन मुख्यमंत्री सहायता निधीला दिले आहे. राज्यातील ११ हजार कृषी सहायक एप्रिलच्या वेतनातून एक दिवसाचा पगार शासनाच्या तिजोरीत जमा करणार आहेत. या माध्यमातून सुमारे दीड कोटी रुपयांचा निधी जमा होईल, असा अंदाज आहे.   

याबाबत संघटनेचे कोषाध्यक्ष अनंत देशमुख म्हणाले की, आज सर्वत्र कोरोनाच्या संकटाविरोधात लढा दिला जात आहे. राज्यातील आरोग्य सेवा, पोलीस प्रशासन, कृषी विभागासह सर्व विभागातील अधिकारी, कर्मचारी आपला जीव धोक्यात घालून नागरिकांसाठी कार्यरत आहेत. राज्यात निर्माण झालेल्या अशा परिस्थितीत सामाजिक भान ठेवून महाराष्ट्र राज्य कृषी सहाय्यक संघटना राज्यभरातील सर्व ११ हजार कृषी सहायकांचे एक दिवसाचे वेतन मुख्यमंत्री सहाय्यता निधीला देणार आहेत.

हा निधी एप्रिलच्या पगारातून कपात केला जावा, अशी विनंती करण्यात आली आहे. संघटनेचे अध्यक्ष सोमनाथ बाचकर, कार्याध्यक्ष धनंजय सोनुने,  कोषाध्यक्ष अनंत देशमुख, सरचिटणीस वसंत जारीकोटे व संघटनेच्या सदस्यांनी हा निर्णय घेतला.