नांदेड जिल्ह्यात पावणेतीन लाख हेक्टरवर रब्बी पेरणी

नांदेड  : नांदेड जिल्ह्यात या वर्षीच्या (२०१९-२०) रब्बी हंगामातील पेरणी क्षेत्रात दुपटीने वाढ झाली आहे. जिल्ह्यात रब्बीचे सर्वसाधारण क्षेत्र १ लाख ३६ हजार ७१२ हेक्टर असताना गुरुवारअखेर (ता. ६) २ लाख ७४ हजार ३२८ हेक्टरवर (२००.६६ टक्के) पेरणी झाली आहे. हरभरा आणि ज्वारीच्या क्षेत्राने सर्वसाधारण क्षेत्राचा टप्पा पार केला आहे, अशी माहिती कृषी विभागाच्या सूत्रांनी दिली.

नांदेड जिल्ह्यात रब्बीचे सर्वसाधारण क्षेत्र १ लाख ३६ हजार ७१२ हेक्टर आहे. यामध्ये रब्बी ज्वारीच्या २६ हजार ९७५, गव्हाच्या ३८ हजार ५३८, मक्याच्या ३ हजार १७८, हरभऱ्याच्या ६२ हजार ३४९, करडईच्या ४ हजार ७६८ हेक्टरचा समावेश आहे. आॅक्टोबर महिन्यात झालेल्या पावसामुळे विहिरी, बोअरच्या पाणीपातळीत वाढ झाली. मोठ्या, मध्यम, लघू प्रकल्पांमध्ये पुरेसा प्रमाणात पाणीसाठा उपलब्ध आहे. त्यामुळे जिल्ह्यातील रब्बीच्या पेरणी क्षेत्रात दुपटीने वाढ झाली आहे. एकूण २ लाख ७४ हजार ३२८ हेक्टरवर (२००.६६ टक्के) पेरणी झाली आहे. यंदा शेतकऱ्यांनी सर्वाधिक प्राधान्य दिल्यामुळे सर्वसाधारण क्षेत्राच्या तुलनेत हरभऱ्याच्या पेरणी क्षेत्रामध्ये तिपटीहून अधिक वाढ झाली आहे.

हरभऱ्याची एकूण १ लाख ९१ हजार ३२१ हेक्टरवर (३०६.८५ टक्के) पेरणी झाली आहे. ज्वारीच्या पेरणी क्षेत्राने सर्वसाधारण क्षेत्राचा टप्पा ओलांडला असून १२३.३५ टक्के क्षेत्रावर पेरणी झाली आहे. गव्हाच्या क्षेत्रात किंचित घट झाली असून ९८.५८ टक्के क्षेत्रावर पेरणी झाली आहे. तेलवर्गीय पीकांमध्ये करडईच्या क्षेत्रातील घट यंदाही कायम आहे. जवस, सूर्यफूल, मोहरी या पिकांची काही प्रमाणात पेरणी झाली आहे. मुखेड तालुका वगळता इतर १५ तालुक्यांतील पेरणी क्षेत्राने सर्वसाधारण क्षेत्राचा टप्पा पार केला आहे.