जनावरांचा अपघाती मृत्यू झाल्यास मदत : पुणे जिल्हा परिषदेचा निर्णय

पुणे  : नैसर्गिक आपत्ती, अपघातांमध्ये जनावरांचा मृत्यू झाल्यास शेतकऱ्यांचे नुकसान होते. अशावेळी शेतकऱ्यांना आधार देण्यासाठी अपघातात जनावर दगावल्यास शेतकऱ्याला पाच ते पंधरा हजार रुपयांची मदत देण्यात येणार आहे. पुणे जिल्हा परिषदेच्या पशुसंवर्धन विभागातर्फे या नावीन्यपूर्ण योजनेसाठी ५ लाख रुपयांची तरतूद करण्यात आली आहे, अशी माहिती कृषी व पशुसंवर्धन विभागाचे सभापती बाबूराव वायकर यांनी दिली.

पशुसंवर्धन विभागाकडून दुर्गम भागातील आणि शेतीक्षेत्र कमी असलेल्या शेतकऱ्यांना शेती कामांकरिता बैल जोडी खरेदीसाठी ५० टक्के अनुदान देण्याची योजनाही जिल्हा परिषदेकडून राबविण्यात येणार आहे. वादळी वारे, जोरदार पाऊस, पूर, जळीत, वीज व झाडपडीच्या घटनांमध्ये जनावरांचा मृत्यू होण्याच्या घटना सातत्याने घडत असतात. यामुळे पशुपालकांचे आर्थिक नुकसान होते. जनावरांचा अपघाती मृत्यू झाल्यास अपघात विमा शेळी, मेंढी या लहान जनावरांसाठी ५ हजार रुपये, तर गाय, बैल, म्हैस या मोठ्या जनावरांना मृत्यू झाल्यास १५ हजार रुपयांची मदत केली जाणार आहे. अधिक माहिती व अर्ज करण्यासाठी पशुवैद्यकीय अधिकारी, ग्रामपंचायत कार्यालय, पंचायत समिती कार्यालयाशी संपर्क साधावा, असे आवाहन करण्यात आले आहे.