पीककर्ज वाटप होत नसल्याने लीड बँक व्यवस्थापकांचा सत्कार !

अकोला ः खरीप हंगाम तोंडावर अालेला असतानाही पीककर्ज वाटप होत नसल्याने शेतकरी त्रस्त झाले अाहेत. याचा निषेध म्हणून मंगळवारी (ता. १२) अकोल्यातील समर्थ संघटनेच्या पदाधिकाऱ्यांनी लीड बँक मॅनेजरला निवेदन देत पुष्पहार घालून त्यांचा प्रतिकात्मक सत्कार केला.  याबाबत संघटनेने दिलेल्या निवेदनात म्हटले, की जिल्ह्यात शेती मशागतीची कामे पूर्ण झाली असून पेरण्या तोंडावर येऊन ठेपल्या आहेत. परंतु शेतकऱ्यांकडे पैसा नाही. कृषी राज्यमंत्री खोत यांनी घेतलेल्या अाढावा बैठकीत पीककर्ज वाटपाबाबत नाराजी व्यक्त केली होती. शेतकरी संकटात असतानादेखील बँका त्यांना पीक कर्जपुरवठा करण्यास टाळाटाळ करीत आहे.  शासनाचे व बँक अधिकाऱ्यांचे डोळे उघडावे, याविषयाचे गांभीर्य लक्षात यावे, यासाठी समर्थ संघटनेचे अध्यक्ष संगम मोहोड व त्यांच्या सहकाऱ्यांनी लीड बँकेचे कार्यालय गाठून अधिकाऱ्याला शाल, श्रीफळ दिले. बँकांनी शेतकऱ्यांना पीककर्ज वाटप न केल्यास यापेक्षाही मोठा सत्कार करून निषेध करण्याचा इशारा संघटनेने दिला. या वेळी संघटनेचे बाळासाहेब ठाकरे, सचिन बोनगिरे, अाकाश सिरसाट, श्रीराम टाले, प्रणव बासोडे, सचिन हागे, रवि बैस, सुनिल गणवीर, गोपाल बंड, सुनील दाेत, चक्रधर काळे यांच्यासह इतर उपस्थित होते.