मराठवाड्यात ज्वारीवर चिकटा, मावा; हरभऱ्यावर घाटे अळी

औरंगाबाद :  औरंगाबाद, जालना व बीड या जिल्ह्यांत सर्वसाधारण क्षेत्राच्या पुढे जाऊन रब्बीची पेरणी झाली. मात्र, ज्वारीवर चिकटा व मावा, तर हरभऱ्यावर पाने खाणारी अळी व घाटे अळीचा प्रादुर्भाव आढळून आला आहे. शिवाय, अपेक्षित थंडीअभावी गव्हाच्या पिकाचीही वाढ खुंटल्याची स्थिती आहे. 

खरिपावर अवेळी पावसाचे संकट आले. त्यानंतर आता रब्बीच्या पिकांची स्थितीही चिंताजनक आहे. औरंगाबाद,  जालना व बीड जिल्ह्यांत रब्बीचे सर्वसाधारण क्षेत्र ८ लाख ५ हजार २८६ हेक्‍टर आहे. त्या तुलनेत प्रत्यक्षात ९ लाख १३ हजार २२१ हेक्‍टरवर पेरणी झाली आहे. 

ज्वारी वाढीच्या, पोटरीच्या अवस्थेत

औरंगाबाद, जालना व बीड जिल्ह्यांत ज्वारीचे सर्वसाधारण क्षेत्र ४ लाख ८८ हजार १४० हेक्‍टर आहे. त्या तुलनेत ३ लाख ५८ हजार ६८१ हेक्‍टरवर पेरणी झाली आहे. सर्वसाधारण क्षेत्राच्या तुलनेत ७३ टक्‍के क्षेत्रावर वेगवेगळ्या वेळात पेरणी झाली. काही ठिकाणी वाढीच्या, काही ठिकाणी पोटरीच्या, तर काही ठिकाणी कणसे लागण्याच्या, भरण्याच्या अवस्थेत आहे. बीड जिल्ह्यात फुलोरा ते दाणे भरण्याच्या अवस्थेत ज्वारी आहे. या पिकावर चिकटा व मावा रोगाचा प्रादुर्भाव दिसून येत आहे. 

गव्हाने धरली कांडी 

औरंगाबाद, जालना व बीड या तीनही जिल्ह्यांत गव्हाचे सर्वसाधारण क्षेत्र १ लाख १७ हजार ४१७ हेक्‍टर आहे. प्रत्यक्षात १ लाख ९५ हजार ३५४ हेक्‍टर क्षेत्रावर पेरणी झाली आहे. सर्वसाधारण क्षेत्राच्या तुलनेत १६६ टक्‍के पेरणी झालेले गव्हाचे पीक कांडी धरणे ते वाढीच्या अवस्थेत आहे. थंडी कमी असल्याने गव्हाची वाढ समाधानकारक नसून पिकावर तांबेरा रोगाचा प्रादुर्भाव दिसून येत आहे. 

यंदा रब्बीवर हरभऱ्याचे वर्चस्व  

औरंगाबाद, जालना व बीड या तीनही जिल्ह्यांत हरभऱ्याचे सर्वसाधारण क्षेत्र १ लाख ५९ हजार ७१० हेक्‍टर आहे. आजपर्यंत ३ लाख १ हजार ४४१ हेक्‍टरवर हरभऱ्याची पेरणी झाली आहे. सर्वसाधारण क्षेत्राच्या तुलनेत १८८ टक्‍के क्षेत्रावर हे पीक आहे. काही ठिकाणी फुले व घाटे लागण्याच्या, तर काही ठिकाणी घाटे भरण्याच्या अवस्थेत आहे. बीड जिल्ह्यात हरभरा पिकावर पाने खाणाऱ्या अळीचा प्रादुर्भाव आढळून आला आहे. काही ठिकाणी घाटे अळीचाही प्रादुर्भाव दिसून आला आहे.