पीक पद्धतीमधील बदलात फायदेशीर शेतीचे मूळ ः कुलगुरू डॉ. भाले

अकोला ः पारंपरिक पद्धतीने करावयाच्या शेतीचे दिवस आता कालबाह्य झाले असून जमिनीचा पोत, उपलब्ध सिंचन सुविधा, बाजारपेठेचा आढावा घेत परिस्थितिनुरूप पीक पद्धतीतील बदल भविष्यातील फायदेशीर शेतीची नांदी आहे. हे आता कृतीतून दाखवायचे दिवस आले असून कृषी विद्यापीठ आपल्या शेतीविषयक प्रत्येक शंकेचे समाधान करण्यासाठी तत्पर असल्याचे प्रतिपादन डॉ. पंजाबराव देशमुख कृषी विद्यापीठाचे कुलगुरू डॉ. विलास भाले यांनी केले.

यंदा खरीप हंगामाला सुरुवात झाली असून बऱ्याच भागांमध्ये समाधानकारक पावसानंतर पेरणीसुद्धा करण्यात आली आहे. याच पार्श्वभूमीवर प्रत्यक्ष शेतातील पिकांची पाहणी व शेतकऱ्यांच्या समस्या जाणून घेण्याच्या हेतूने कुलगुरू डॉ. भाले यांनी बाळापूर तालुक्यातील अडोशी-कडोशी परिसरातील शेतकऱ्यांच्या शेतीला भेट दिली.

या प्रसंगी शेतकऱ्यांनी शेतीविषयक समस्या तथा विद्यापीठ व शासनाकडून अपेक्षा संदर्भात चर्चा केली.  कृषी विद्यापीठाच्या कृषी विद्यापीठाच्या मार्गदर्शनात सूर्यफूल, ज्वारी, करडई, ओवा, हरभरा, सोयाबीन, तूर, कपाशी आदी पिकांचे विक्रमी उत्पादन घेणारे शेतकरी याच भागातील असून केवळ जंगली प्राणांच्या उपद्रवाने अधिक फायदा देणारी पिके घेता येत नसल्याची खंत प्रगतिशील शेतकरी पांडुरंग गायकी यांनी व्यक्त केली.

कपाशी पिकातील बीटी वाण लागवड करताना येणाऱ्या अडचणी संदर्भात सुद्धा चर्चा केली. विद्यापीठाने कपाशीचे बीटी वाण तसेच सोयाबीन, उडीद, तूर या पिकांचे भरघोस उत्पन्न देणारे नवीन वाण शेतकऱ्यांना उपलब्ध करून दिल्याबद्दल विद्यापीठाचे आभार मानले. परिसरातील शेतीविषयक उपलब्धींविषयी विद्यापीठाचे कापूस कीटकशास्त्रज्ञ डॉ. प्रशांत नेमाडे यांनी अवगत केले.