हमीभावाने मूग, उडीद खरेदीसाठी आजपासून नोंदणी

अकोला : सध्या बाजारपेठेत मूग, उडदाला कमी दर मिळत असल्याने पणन खात्याने किमान आधारभूत दराने (एमएसपी) शेतमाल खरेदीची घोषणा केली अाहे. मागील खरेदीच्या वेळी शासकीय यंत्रणांची झालेली दमछाक पाहता या वेळी शेतकऱ्यांना त्यांच्या शेतमालाची अाधी नोंदणी करावी लागणार अाहे.

यासाठी मंगळवार (ता. ३) पासून राज्यात जवळपास ८३ केंद्रांवर नोंदणी करता येणार अाहे. त्यानंतर शासनाच्या अादेशानुसार मूग, उडीद खरेदीची प्रक्रिया सुरू केली जाणार असल्याची माहिती सूत्रांनी दिली.

शेतमालाला हमीभाव मिळावा या उद्देशाने शासनाकडून खरेदी केली जाते. सध्याच्या परिस्थितीत कुठल्याही बाजारात मूग, उडीद या पिकांना हमीभावसुद्धा मिळेनासा झालेला अाहे. मुगाचा दर ४२०० ते ४९०० रुपये प्रतिक्विंटल अाणि उडीद ४१०० ते ४७०० रुपये प्रतिक्विंटल या दरम्यान विकत अाहे. वास्तविक मुगाला ५३७५ रुपये हमीभाव आणि २०० रुपये बोनस आहे, तर उडदाला ५२०० रुपये हमीभाव आणि २०० रुपये बोनस आहे.

हमीभाव व सध्या मिळत असलेल्या दरात सातशे ते अाठशे रुपयांची तफावत अाहे. अाधीच मूग, उडदाची पीक उत्पादकता ५० टक्क्यांपेक्षा अधिक खालावलेली अाहे, त्यामुळे निदान हमीभाव तरी या शेतमालाला मिळावा, अशी मागणी केली जात होती.

शासनाने हमीभाव केंद्र सुरू करण्याची मागणी सर्वत्र झाल्यानंतर या मागणीला हिरवा कंदील मिळाला. परंतु या वेळी थेट केंद्र उघडले जाणार नाही. गेल्या काळात नाफेडच्या खरेदीत झालेले गोंधळ पाहता अाता शेतकऱ्यांकडून त्यांच्या शेतमालाची नोंदणी करून घेतली जाईल.

शेतकऱ्याला किती माल विकायचा अाहे, त्याने किती लागवड केली होती, याची माहिती दर्शविणारा सातबारा, पेरापत्रक, अाधार क्रमांक, बँक खात्याची सविस्तर माहिती हे सर्व सादर करावे लागेल. त्यानंतरच शासनाचे पुढील अादेश मिळाल्यानंतर प्रत्यक्ष खरेदी सुरू केली जाईल. शेतकऱ्यांना त्यांनी माल कधी विक्रीसाठी अाणायचा याचा मेसेज पाठवला जाणार अाहे.

राज्यात पहिल्या विविध जिल्ह्यांतील ८३ केंद्रांवर नोंदणीची सुविधा दिली जात अाहे. यात वऱ्हाडातील बुलडाणा जिल्ह्यातील बुलडाणा, चिखली, मेहकर, लोणार, सिंदखेडराजा, शेगाव, खामगाव, मलकापूर, संग्रामपूर, देऊळगावराजा; अकोला जिल्ह्यातील अकोला, अकोट, तेल्हारा, मूर्तिजापूर अाणि वाशीम जिल्ह्यातील वाशीम, मंगरुळपीर, कारंजा व रिसोड या केंद्रांचा समावेश अाहे.