पुणे जिल्ह्यात रब्बीत १९१० पीककापणी प्रयोग

पुणे ः पिकांची उत्पादकता आणि पीकविमा नुकसानभरपाई निश्चित करण्यासाठी पीककापणी प्रयोग घेण्यात येणार आहे. चालू वर्षी रब्बी हंगामात पीकविमा योजना मंडळ, मंडळ गटामध्ये प्रत्येक पिकांसाठी किमान बारा प्रयोग घेणे अनिवार्य आहेत. पुणे जिल्ह्यात एकूण एक हजार ९१० पीक कापणी प्रयोग घेण्यात येणार असल्याची माहिती कृषी विभागाच्या सूत्रांनी दिली.

रब्बी हंगाम २०१९-२० अंतर्गत पुणे जिल्ह्यात पीककापणी प्रयोग हे पीकविमा नुकसानभरपाई निश्चित करण्यासाठी महत्त्वाचे आहे. त्यामुळे पीककापणी प्रयोग अत्यंत काळजीपूर्वक करणे आवश्यक आहे. पीक कापणीचे प्रयोग विहित कालमर्यादेत पूर्ण करून त्याची माहिती पंतप्रधान पीकविमा योजनेअंतर्गत केंद्र शासनास सादर केली जाते. 

पीककापणी प्रयोग महसूल ग्रामविकास व कृषी या तिन्ही यंत्रणांमार्फत करण्यात येते. पिकांची उत्पन्नाची आकडेवारी कृषी विभागाला अचूक व वेळेवर उपलब्ध होण्यासाठी पीक कापणी प्रयोगाचे नियोजन, अंमलबजावणी आणि पर्यवेक्षणासाठी प्रत्येक तालुक्यात समिती स्थापन करण्यात आली आहे. समितीमध्ये तहसीलदार, गटविकास अधिकारी, तालुका कृषी अधिकारी, तालुका विकास अधिकारी ग्रामीण बॅंकेचे तालुक्याचे बॅंक प्रतिनिधी, विमा प्रतिनिधी आहेत. तसेच ग्राम स्तरावर समिती स्थापन करण्यात येते. त्यामध्ये तलाठी, ग्रामसेवक, कृषी सहायक, पोलिस पाटील, सरपंच, उपसरपंच, विमा प्रतिनिधी, शेतकरी प्रतिनिधी सदस्य आहेत. 

पीककापणीच्या वेळेस ग्रामस्तरीय समितीमध्ये सदस्य उपस्थित राहणे आवश्यक आहे. पीककापणी प्रयोगासाठी मोबाईल अॅप बंधनकारक आहे. पीकविमा योजना मंडळ, मंडळ गटात प्रत्येक पिकांसाठी किमान बारा प्रयोग, तालुका, तालुका गट स्तरावर सोळा प्रयोग घेणे अनिवार्य आहे. पुणे जिल्ह्यात एकूण एक हजार ९१० एवढे प्रयोग असून, त्यापैकी महसूल विभागाने ४०२, जिल्हा परिषदेने ६०० आणि कृषी विभागाने ९०८ प्रयोग घेणे बंधनकारक आहे. 

पीक कापणी प्रयोगासाठी पुणे जिल्ह्यात मुख्य पिकांची एकूण दोन लाख ११ हजार ७६२ हेक्टरवर पेरणी झाली असल्याची नोंद करण्यात आली आहे. तसेच २ हजार ६६७ शेतकऱ्यांनी एक हजार ४२८ हेक्टर क्षेत्राचा पीकविमा काढला आहे.