छोट्या शेतकऱ्यांच्या समस्या कायम ः कुलगुरू डॉ. के. पी. विश्‍वनाथा

राहुरी विद्यापीठ, जि. नगर : विविध पिकांच्या लागवडीपासून काढणीपर्यंत शेतकऱ्यांसाठी अनेकविध यंत्रसामुग्री बाजारामध्ये उपलब्ध असून देखील राज्यातील छोट्या शेतकऱ्यांना ही यंत्रसामग्री विकत घेणे परवडत नाही, शेतमजुरांचा तुटवडा, पिकांची वेळेवर काढणी अशा अनेक समस्या आज राज्यातील शेतकऱ्यांसमोर आहेत. त्याकडे शास्त्रज्ञांनी लक्ष देणे गरजेचे बनलेले आहे, असे प्रतिपादन कुलगुरू डॉ. के. पी. विश्‍वनाथा यांनी केले. 

भारतीय ऑटोमोटिव्ह इंजिनिअर्स सोसायटी (एस. ए. ई.) व महात्मा फुले कृषी विद्यापीठ राहुरी यांच्या संयुक्त विद्यमाने ‘तिफन-२०१९’ या कार्यक्रमाच्या उद्‌घाटनप्रसंगी ते बोलत होते. 

या वेळी डॉ. आण्णासाहेब शिंदे कृषी अभियांत्रिकी महाविद्यालयाचे सहयोगी अधिष्ठाता डॉ. दिलीप पवार, सोसायटीचे नीलेश पाठक, अभिजित वराडे, संजय निबंधे, आयोजक संदीप महाजन, विभाग प्रमुख डॉ. सचिन नलावडे उपस्थित होते.

कुलगुरू पुढे म्हणाले, ‘‘आज कृषी अभियांत्रिकीच्या विद्यार्थ्यांनी छोट्या शेतकऱ्यांशी चर्चा करून त्यांच्या अडचणी समजून घेऊन त्यांच्या मागणीनुसार कृषियंत्रे विकसित करणे गरजेचे आहे. ता. १८ ते २० मार्च या कालावधीमध्ये देशभरातील ५७५ विद्यार्थी व ५२ मार्गदर्शक सहभागी झालेले आहेत. कांदा पीक काढणी या थिमवर या विद्यार्थ्यांच्या २५ संघांनी कांदा काढणीसाठी विविध कंपन्यांच्या सहकार्याने विकसित केलेले आहे. ३० पंचांच्या साह्याने या यंत्रांची गुणवत्ता तपासली जाणार आहे. याद्वारे लहान शेतकऱ्यांना शेती करणे सोईचे होईल.’’ कार्यक्रमाचे सूत्रसंचालन नेहा व विशाल यांनी केले. डॉ. सचिन नलावडे यांनी आभार मानले.