पुणे : पुणे कृषी उत्पन्न बाजार समितीमधील फळे, भाजीपाला, कांदा, बटाटा विभागाच्या पुनर्विकासाला अडत्यांनी एकमुखी विराेध केला आहे. पुनर्विकास करताना बाजार आवाराच्या हाेणारे स्थलांतर, निर्धारित वेळेची साशंकता, अतिरिक्त द्यावयाची रक्कम आदी कारणांमुळे बाजारपेठ उद्धवस्त हाेण्याची भीती असल्याने अडते असाेसिएशनने पुनर्विकासाला विराेध केला आहे.
मात्र एक दाेन बैठकांमध्ये हा निर्णय हाेणारा नसून, सर्व घटकांशी सकारात्मक चर्चा करून प्रकल्प मार्गी लावू, असा विश्‍वास बाजार समितीचे मुख्य प्रशासक दिलीप खैरे यांनी व्यक्त केला.
पुणे बाजार समितीच्या पुनर्विकासासाबाबतच्या आराखड्याचे सादरीकरण गुरुवारी (ता. ९) बाजार समिती प्रशासनाच्या वतीने अडते असाेसिएशनच्या सर्वसाधारण बैठकीत केले. या वेळी बाजार समितीच्या प्रशासकीय मंडळाचे मुख्य प्रशासक दिलीप खैरे, उपमुख्य प्रशासक भूषण तुपे, सदस्य अनिल देवढे, राजेंद्र काेरपे, सचिव पी. एल. खंडागळे अडते असाेसिएशनचे अध्यक्ष विलास भुजबळ यांच्यासह बाजार आवारातील अडते माेठ्या संख्येने उपस्थित हाेते.
या वेळी बाेलताना अडते असाेसिएशनचे अध्यक्ष विलास भुजबळ म्हणाले, ‘‘बाजार समितीच्या वतीने फळे, भाजीपाला, कांदा, बटाटा विभागाच्या पुनर्विकासाची प्रक्रिया सुरू आहे. याबाबतच्या आराखड्याचे सचित्र सादरीकरण सर्व अडत्यांना करण्यात आले. मात्र पुनर्विकासादरम्यान बाजाराचे हाेणारे स्थलांतर, पुर्नविकास वेळेवर पूर्ण हाेईल का? याबाबतची साशंकता, गाळ्यांचे अतिरिक्त द्यावयाच्या शुल्काबाबत आडत्यांमध्ये साशंकता आणि भीतीचे वातावरण आहे.
वेळेत पुनर्विकास न झाल्यास आणि बाजार आवाराच्या हाेणाऱ्या स्थलांतरामुळे व्यवसायावर विपरित परिणाम हाेण्याची भीती व्यापाऱ्यांमध्ये आहे. यामुळे सर्व आडत्यांनी पुनर्विकासाला विराेध केला आहे. त्याच परिस्थितीत आणि जागेवर पुनर्विकास करणार असाल तरच पुढे चर्चा करू, अशी भूमिका घेतली आहे.
प्रशासकीय मंडळाचे मुख्य प्रशासक दिलीप खैरे म्हणाले, ‘‘स्ट्रक्चरल आॅडिटमध्ये सर्व गाळे धाेकादायक झाले असल्याचे स्पष्ट आहे. ३५ वर्षांपूर्वी निर्माण केलेल्या पायाभूत सुविधांवर आता अतिरिक्त ताण येत असल्याने पुनर्विकास करणे आवश्‍यक आहे. यासाठी विविध घटकांशी सकारात्मक चर्चा सुरू आहे. अडते असाेसिएशनच्या शिष्टमंडळाची सहकारमंत्री सुभाष देशमुख, पालकमंत्री गिरीष बापट यांच्या साेबत बैठक घेऊन पुढील निर्णय घेऊ.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.