कोल्हापुरात खरीप कापणी, मळणी कामांनी शिवारे गजबजली

कोल्हापूर : वळीव पावसाने विश्रांती घेतल्याचे दिसताच जिल्ह्यात खरीप कापणी व मळणीच्या कामांनी वेग घेतला आहे. गेल्या चार दिवसांत बहुतांशी ठिकाणी वळीव पाऊस झाला नाही. दिवसभर कडक ऊन असल्याने शेतकरी तातडीने खरीप पिकांची काढणी करून मळणी करीत असल्याने पुन्हा शिवारे शेतकऱ्यांनी गजबजून गेली आहेत.

जिल्ह्याच्या पूर्व भागात सोयाबीनचे; तर पश्‍चिम भागात भाताचे पीक जादा प्रमाणात आहे. सध्या ही पिके काढणीच्या अवस्थेत आहेत. पेरणीपासून ते काढणीपर्यंतचा कालावधी यंदा शेतकऱ्यांची परीक्षा पाहणारा ठरला आहे. बदलत्या निसर्गातून वाचलेल्या पिकांची मळणी करुन आहे ते धान्य सुरक्षित ठिकाणी ठेवण्यासाठी शेतकरी गडबड करीत आहे.

भाताची झोडपणी अनेक ठिकाणी हाताने मजुरांच्या साहाय्याने होत आहे. सोयाबीनसाठी मात्र मळणी यंत्राचाच वापर बहुतांशी ठिकाणी सुरू आहे. क्षेत्रानुसार शेतकरी लहान, मध्यम व मोठ्या आकाराच्या मळणी यंत्राला प्राधान्य देत आहे. संध्याकाळच्या वेळेला पाऊस येण्याची शक्‍यता असल्याने सकाळी आठ वाजल्यापासून कापणी करून दुपारनंतर मळणी करण्याकडे शेतकऱ्यांचा कल आहे. पावसाची चिन्हे दिसताच तातडीने धान्य सुरक्षित ठेवण्याची यंत्रणा ठेवूनच शेतकरी मळणी करत असल्याचे चित्र आहे. गेल्या वर्षीच्या तुलनेत अपवाद वगळता अनेक ठिकाणी सोयाबीन व भाताच्या उत्पन्नात दहा ते पंधरा टक्क्‍यांची घट येत असल्याची माहिती शेतकऱ्यांनी दिली.

सलग झालेला पाऊस त्यानंतर पडलेले कडक ऊन व वळीवाच्या पावसाने आडव्या झालेल्या पिकांमुळे उत्पन्नात घट येत असल्याचे चित्र आहे. यातच डिझेलचे दर वाढत असल्याने मळणीयंत्र धारकांनीही भाड्यात काहीशी वाढ केली आहे. याचा भुर्दंडही शेतकऱ्यांवर बसत आहे. गेल्या आठ दिवसांपासून मळणीच्या कामांनी वेग घेतला आहे. वळीव पाऊस न झाल्यास येत्या पंधरा दिवसांत बहुतांशी कापणी व मळण्यांची कामे पूर्ण होण्याचा अंदाज कृषी विभागाचा आहे.