मराठवाड्यात जोरदार पावसाचा पिकांना फटका

औरंगाबाद, परभणी : औरंगाबाद, जालना, बीड, लातूर, उस्मानाबाद आणि परभणी या सहा जिल्ह्यात पावसाची कमी-अधिक प्रमाणात हजेरी कायम आहे. गुरुवारी (ता. १७) सकाळपर्यंतच्या चोवीस तासांत औरंगाबादमधील तीन व लातूर मधील एका मंडळांत अतिवृष्टीची नोंद झाली. तर, इतर मंडळांमध्ये दमदार पाऊस झाला.

औरंगाबाद जिल्ह्यातील २५ मंडळांत पाऊस झाला. मांजरी मंडळात सर्वाधिक ९२.५ मिलिमीटर, त्यापाठोपाठ गंगापूर ७१.८, सिद्धनाथ ७१.३ मिलिमीटर पाऊस झाला. भेंडाळा मंडळात ३८, हरसुल ३७.८, डोनगाव २२.५, वैजापूर २३.८, तर लासुरगाव मंडळात ३६.८ मिलिमीटर पावसाची नोंद झाली.

जालना जिल्ह्यातील १९ मंडळात तूरळक ते हलका पाऊस झाला. लातूर जिल्ह्यातील कासारशिरसी मंडळात सर्वाधिक ११९.३ मिलिमीटर पावसाची नोंद झाली. जिल्ह्यातील इतर ५० मंडळांत मध्यम, दमदार पाऊस झाला. कासारखेडा मंडळात २५ मिलिमीटर, किल्लारी ३७.५ ,अंधोरी ३१.३, निलंगा ४६.८, निटुर ४३.८, कासार बालकुंदा ५६, अंबुलगा ५८ , मदनसुरी ३६, हलगरा ५४.५, भातंगळी ५१, देवणी २४.५, बोरोळ २४.३, तर साकुर मंडळात ५४.५ मि.मी पाऊस झाला.  

बीड जिल्ह्यातील ५२ मंडळांत तुरळक ते हलका पाऊस झाला. जिल्ह्यातील सिरसदेवी मंडळात सर्वाधिक ३२.३ मिलिमीटर त्यापाठोपाठ नित्रुड १७, अंबाजोगाई १५.८, तर, बनसारोळा मंडळात १८.८ मि.मी पाऊस झाला. उस्मानाबाद जिल्ह्यातील ३३ मंडळांत पाऊस झाला. दरम्यान गुरुवारी (ता. १७) दुपारी साडे बारापासून पाथरूड, दुधोडी, सावरगाव, उमाचीवाडी, बागलवाडी, वडाचीवाडी परिसरात मेघगर्जनेसह जोरदार पाऊस होता.

परभणी, हिंगोलीत जोरदार

परभणी, हिंगोली जिल्ह्यातील ५८ मंडळांत गुरुवारी (ता.१७) सकाळी आठ पर्यंतच्या २४ तासांमध्ये हलका ते जोरदार पाऊस झाला. परभणी जिल्ह्यातील एका मंडळात अतिवृष्टी झाली. त्यामुळे पिकांचे नुकसान झाले. ३० मंडळांमध्ये हलका ते जोरदार पाऊस झाला.

परभणी, जिंतूर, पालम तालुक्यातील मंडळामध्ये जोरादर पाऊस झाला. पिंगळी (ता.परभणी) मंडळात अतिवृष्टी झाली. हिंगोली जिल्ह्यातील २८ मंडळांत हलका ते जोरदार पाऊस झाला. हिंगोली, औंढा नागनाथ, सेनगाव तालुक्यातील मंडळामध्ये जोरदार पावसाने हजेरी लावली.