कोल्हापुरात भाजीपाल्याच्या आवकेत घट

कोल्हापूर : गेले दहा बारा दिवस धुवाधार पाऊस सुरू असल्याने विविध नद्यांना पूर आला. ओढे नाले भरून वाहत आहेत. याचा परिणाम म्हणून शाहू मार्केट यार्डातील भाजीपाला, कांदा बटाटा खरेदी विक्रीवर परिणाम झाला आहे. कोकणाकडे जाणारा भाजीपाल्याचा माल निम्म्याने घटला आहे. शिरोळ, सांगली भागांतून येणाऱ्या भाजीपाल्याची आवकही कमी झाली आहे. त्यामुळे बाजारात सोमवारी (ता. ५) सौदे व्यवहार निम्म्याने घटले.

बाजार समितीत दररोज पहाटे भाजीपाला सौदे निघतात. त्यासाठी जवळपास दीडशे ते दोनशे गाड्या भाजीपाल्याची आवक होते. यात शिरोळ तालुक्यातून येणारी वांगी, भेंडी, गवार, कालीफ्लॉवर, कोबी, अशा भाज्यांची आवक गेली तीन दिवस थंडावली आहे. या भागातून रोज किमान २५ गाड्या माल येतो. तो आलेला नाही. थोड्याफार फरकाने अशीच स्थिती चिकोडी, गोकाक या भागातून येणाऱ्या भाजीपाल्याची आहे.  तेथून ही जवळपास १५ ते २० गाड्या येऊ शकलेल्या नाहीत. अशात इस्लामपूर, जुनोनी कवठेमंकाळ, कागल या भागांतून पर्यायी मार्गाने काही भाजीपाल्याच्या गाड्या आल्या. तेवढ्याच शंभरावर गाड्यातील भाजीपाल्याची सौदे झाले. 

या सौद्यात बहुतांशी भाजीपाला स्थानिक किरकोळ विक्रेत्यांनी खरेदी केला. तोच माल कोल्हापुरातील विविध भाजी मंडईत विकला जात आहे. रत्नागिरीकडे जाणारा मार्ग केरली दरम्यान बंद असल्यामुळे रत्नागिरीकडे भाजीपाला जाऊ शकला नाही. थोड्याफार फरकाने सिंधुदुर्ग, मालवण, सावंतवाडी या भागाकडे पाठवल्या जाणाऱ्या मालाची मागणी कमी आहे. त्यामुळे पूर्ण क्षमतेने सौदेही झाले नाहीत. माल पाठवला गेला नाही. दोन ते तीन गाड्यांचा माल आंबोली मार्गे गोव्याकडे रवाना झाल्याचे बाजार समितीतील सूत्रांनी सांगितले.